Урадавую дэлегацыю Беларусі на Пецярбургскім форуме ўзначальвае Снапкоў
Урадавая дэлегацыя Беларусі на чале з першым намеснікам прэм'ер-міністра Мікалаем Снапковым прыбывае ў Санкт-Пецярбург для ўдзелу ў XXVI Пецярбургскім міжнародным эканамічным форуме (ПМЭФ). У яго рабоце таксама прымае ўдзел пасол Беларусі ў Расіі Дзмітрый Крутой, паведамілі БЕЛТА ў прэс-службе беларускай дыпмісіі.
Праграма ПМЭФ налічвае больш за 140 мерапрыемстваў у розных фарматах, у тым ліку пленарнае пасяджэнне, панэльныя сесіі, круглыя сталы, дыскусіі, дзелавыя сняданкі, дэбаты і пітч-сесіі. Галоўная тэма - "Суверэннае развіццё - аснова справядлівага свету. Аб'яднаем намаганні ў імя будучых пакаленняў". Дзелавая праграма форуму падзелена на пяць тэматычных блокаў. Кожны з іх прысвечаны бягучым глабальным працэсам у свеце, якія вядуць да фарміравання прынцыпова новай шматпалярнай эканамічнай мадэлі і адкрываюць прастору для раўнапраўнага канструктыўнага дыялогу з бакамі, зацікаўленымі ва ўстойлівым развіцці і супрацоўніцтве.
Адна з сесій прысвечана стратэгіі ўзаемадзеяння Беларусі і Расіі ў рамках Саюзнай дзяржавы. Яна запланавана на 15 чэрвеня. У ходзе гэтага пасяджэння плануецца ўзняць тэмы: што ўдалося вырашыць Беларусі і Расіі ў пытанні імпартазамяшчэння, як узаемадзейнічаюць бізнес-супольнасці і наладжваюцца кааперацыйныя сувязі.
"Удзел Беларусі ў форуме дае магчымасць айчыннаму бізнесу ствараць эфектыўныя кааперацыйныя ланцужкі, пашыраць кантакты з расійскімі рэгіёнамі, а таксама прадастаўляе новыя магчымасці для супрацоўніцтва як у рамках Саюзнай дзяржавы, так і ў ЕАЭС", - адзначылі ў прэс-службе.
"Акрамя ўдзелу ў рабоце ПМЭФ-2023, у праграме рабочай паездкі пасла Дзмітрыя Крутога таксама прадугледжаны ўдзел у чарговым пасяджэнні Сумеснай камісіі па развіцці супрацоўніцтва з Ленінградскай вобласцю, наведванне шэрага перспектыўных аб'ектаў паўночнай сталіцы Расіі, а таксама сустрэчы з 18 губернатарамі расійскіх рэгіёнаў", - расказалі ў прэс-службе.
ПМЭФ арганізуецца штогод з 1997 года. З 2005 года ён праходзіць пад патранатам і пры ўдзеле Прэзідэнта Расійскай Федэрацыі. У мерапрыемствах ПМЭФ-2022 прынялі ўдзел больш за 14 тыс. чалавек са 130 краін. Сярод іх - кіраўнікі дзяржаў і ўрадаў, кіраўнікі буйнейшых кампаній, а таксама вядучыя сусветныя эксперты з ліку прадстаўнікоў навуковых колаў і грамадзянскай супольнасці.
