У Беларусі распрацуюць стратэгіі развіцця ўсіх галін прамысловасці на бліжэйшыя 10 гадоў
У Беларусі распрацуюць стратэгіі развіцця ўсіх галін прамысловасці на бліжэйшыя 10 гадоў. Аб гэтым паведаміў журналістам міністр эканомікі Юрый Чабатар у час семінара-нарады Палаты прадстаўнікоў на тэму "Аб рабоце беларускіх аўтамабілебудаўнічых прадпрыемстваў па рэалізацыі задач Года якасці", перадае карэспандэнт БЕЛТА.
"Разам з калегамі працуем над стратэгіяй развіцця да 2030-2035 гадоў усіх галін прамысловасці. Мы з ДКНТ стварылі сумесную калегію і раз у месяц разглядаем перспектывы развіцця кожнай з галін. Ужо абмеркавалі дрэваапрацоўку, нафтахімію, фармацыю, наступным будзем разглядаць машынабудаванне. Да канца года павінны будзем з усімі распрацаваць стратэгіі развіцця на бліжэйшыя 10 гадоў. Ключавымі для машынабудавання, вядома, будуць лакалізацыя, нарошчванне кампетэнцый, рэалізацыя сумесных праектаў з Расіяй", - сказаў Юрый Чабатар.
Паводле яго слоў, машынабудаванне было і застаецца ключавым пунктам росту прамысловасці. "У мінулым годзе мы дасягнулі максімальных тэмпаў росту прамысловай вытворчасці (амаль 108 працэнтаў), пры гэтым уклад машынабудавання быў асноўным. Што датычыцца экспарту, уклад машынабудавання таксама вельмі вялікі. Гэта адна з асноўных экспартна-арыентаваных і высокатэхналагічных галін. У гэтым годзе мы дабаўляем у аб'ёмах вытворчасці і экспарту грузавікоў, дасягнулі максімальных магутнасцей па аўтобусах, легкавых аўтамабілях, рэалізуюцца праекты ў сферы электратранспарту. Трэба прапрацоўваць новыя праекты, гэта ключавое, таму што попыт на рынку і ў далейшым будзе расці на гэту прадукцыю, нам трэба займаць нішы, падцягваць якасць", - падкрэсліў міністр.
