Цэны і насычэнне паліц таварамі: КДК сочыць за сітуацыяй на рынку напярэдадні Новага года

Камітэт дзяржаўнага кантролю сочыць за сітуацыяй на спажывецкім рынку напярэдадні Новага года - як за выкананнем заканадаўства аб цэнаўтварэнні, так і за насычэннем паліц таварамі. Аб гэтым заявіў 20 снежня журналістам намеснік старшыні КДК Андрэй Лабовіч, перадае карэспандэнт БЕЛТА.

"Стан спажывецкага рынку знаходзіцца пад пільнай увагай Камітэта дзяржаўнага кантролю, асабліва пасля прыняцця Дырэктывы нумар 10 "Аб недапушчальнасці росту цэн" і пастановы ўрада нумар 713 "Аб сістэме рэгулявання цэн". Мы зрабілі акцэнт на кантролі за выкананнем уведзеных абмежаванняў па ўзроўні цэн. Пераважная большасць суб'ектаў гаспадарання выконвае заканадаўства, прынятыя нарматыўныя прававыя акты выконваюцца. Але выяўляюцца асобныя факты перавышэння гандлёвых надбавак, іншыя парушэнні, у тым ліку санітарна-эпідэміялагічных норм. Пратэрмінаваная прадукцыя аператыўна выключаецца па патрабаванні кантралёраў, наводзіцца парадак", - расказаў Андрэй Лабовіч.

Ён адзначыў, што пры выяўленні недапушчальных парушэнняў заканадаўства дадзена права прыпыняць работу гандлёвых аб'ектаў. Пасля прыняцця пастановы нумар 713 такія меры былі прыняты ў адносінах да 14 магазінаў.

"Сёння мы сумесна з Міністэрствам антыманапольнага рэгулявання і гандлю праводзім нараду з удзелам вытворцаў, імпарцёраў, гандлёвых сетак. Хочам звярнуць іх увагу на неабходнасць насычэння гандлёвых паліц разнастайным асартыментам, які карыстаецца попытам напярэдадні калядных і навагодніх свят", - дадаў намеснік старшыні КДК.