Тарасенка: пілотны праект дазволіць выбраць аптымальную мадэль школьнага харчавання

Рэалізацыя пілотнага праекта Міністэрства адукацыі дазволіць выпрацаваць аптымальную мадэль па арганізацыі школьнага харчавання. Такое меркаванне выказаў намеснік міністра аховы здароўя - галоўны дзяржаўны санітарны ўрач Аляксандр Тарасенка пры наведванні СШ нумар 1 Брэста, перадае карэспандэнт БЕЛТА.

"Праект будзе рэалізоўвацца да 1 мая. Але мы не будзем чакаць гэтай даты. У працэсе будуць абмяркоўвацца станоўчыя, адмоўныя моманты, каб, пачынаючы з новага навучальнага года, паўсюдна паэтапна рэалізоўваць праект і выбраць рацыянальную, аптымальную і якасную мадэль арганізацыі школьнага харчавання", - сказаў намеснік міністра.

У Брэсце сёння праходзіць выязное пасяджэнне Рэспубліканскага санітарна-эпідэміялагічнага савета з удзелам галоўных дзяржаўных санітарных урачоў усіх абласцей і Мінска. Разглядаюцца пытанні павышэння якасці і бяспекі харчавання вучняў ва ўстановах агульнай сярэдняй адукацыі. Удзельнікі наведалі адну з буйнейшых школ Брэста - СШ нумар 1, дзе азнаёміліся з рэалізацыяй пілотнага праекта па апрабацыі новых тэхналогій і прынцыпаў арганізацыі школьнага харчавання.

У школе навучаецца больш за 1,8 тыс. навучэнцаў. Больш за 80 працэнтаў з іх атрымліваюць двухразовае харчаванне ў выглядзе абедаў і падвячоркаў. Да правядзення праекта тут пачалі рыхтавацца яшчэ да зімовых канікулаў. Было праведзена анкетаванне дзяцей і іх бацькоў, каб вызначыць іх смакавыя перавагі. Камбінат грамадскага харчавання распрацаваў тэхналагічныя карты новых страў і правёў іх дэгустацыю. Практычную рэалізацыю ў школе пачалі 9 студзеня - з пачаткам трэцяй чвэрці.

Як адзначыла дырэктар школы Маргарыта Багдановіч, цяпер ва ўстанове адукацыі ідзе ўжо другі этап рэалізацыі пілотнага праекта: апрабуецца меню, якое абнавілася напалову, штодзень вывучаецца і аналізуецца меркаванне вучняў.

"Мы распрацавалі шмат новых салатаў. На жаль, дзеці іх не ацанілі - яны хочуць парцыённую агародніну. На трэцяе яны выбіраюць чай і напіткі без пладоў, а не традыцыйны кампот. Затое амаль усе нашы гарачыя стравы дзецям спадабаліся. Таму ўсё карэкціруецца ў працэсе", - адзначыла намеснік дырэктара камбіната грамадскага харчавання Жанна Дуньковіч.

Акрамя школы ў абласным цэнтры ўдзельнікамі пілотнага праекта Міністэрства адукацыі ў Брэсцкай вобласці сталі Маларыцкая СШ нумар 1 і сярэдняя школа ў аграгарадку Чарнаўчыцы Брэсцкага раёна. Таксама па тры школы, гарадскія і сельскія, вызначаны для правядзення эксперымента ў кожнай вобласці.

"Усё змяняецца і карэкціруецца ў працэсе. Мы бачым, што ёсць некаторыя моманты, якія трэба выпраўляць, - і па часе прыёму ежы, і па распрацоўцы новых тэхналагічных карт і страў у меню. Для арганізацыі школьнага харчавання выдзяляюцца немалыя дзяржаўныя грошы. Я не сказаў бы, што мы тут кардынальна нешта мяняем. Мы проста ўдасканальваемся ў гэтым пытанні", - рэзюмаваў Аляксандр Тарасенка.-