Мінэканомікі: вартасныя аб'ёмы беларускага экспарту тавараў і паслуг - максімальныя з 2012 года

Беларускі экспарт тавараў і паслуг у студзені-ліпені вырас на 6,4 працэнта, яго вартасныя аб'ёмы - максімальныя з 2012 года. Аб гэтым заявіла начальнік упраўлення прагназавання знешняга гандлю Міністэрства эканомікі Юлія Зубар, каменціруючы дынаміку беларускага экспарту за 7 месяцаў бягучага года, паведамілі БЕЛТА ў прэс-службе Мінэканомікі.

"У структуры экспартнай карзіны адбыліся якасныя змяненні: у ёй стала менш сыравіны і матэрыялаў, больш інвестыцыйных тавараў. Доля апошніх перасягнула 13 працэнтаў - гэта 16-гадовы максімум. Экспарт грузавікоў вырас амаль на 17 працэнтаў, прычэпаў і паўпрычэпаў - у 2,7 раза, аўтобусаў - на 17,5 працэнта. І гэта да базы мінулага года, калі пастаўкі раслі двухзначнымі тэмпамі", - падкрэсліла Юлія Зубар.

Паводле слоў начальніка ўпраўлення, у мэтах пашырэння існуючых і пабудовы новых гандлёва-эканамічных сувязей з дружалюбнымі краінамі адбываецца карэкціроўка знешнегандлёвай стратэгіі Беларусі. Доля гэтых дзяржаў у экспарце вырасла на 18 працэнтаў, экспартныя патокі поўнасцю пераарыентаваны.

"Пастаўкі ў краіны Азіі выраслі ў 1,7 раза. Паспяхова асвойваюцца перспектыўныя рынкі Афрыкі. Захоўваюцца высокія тэмпы росту экспарту ў Расію (130,8 працэнта). Адыход заходніх пастаўшчыкоў і вытворцаў дазволіў павялічыць нашу прысутнасць на расійскім рынку. У прыватнасці, істотна ўзрасла доля айчынных тавараў у расійскім імпарце машын, абсталявання і транспартных сродкаў, прадукцыі хімічнай прамысловасці, вырабаў з драўніны і чорных металаў", - адзначыла Юлія Зубар.

Праектам планавых дакументаў на 2024 год прадугледжаны прырост па экспарце ў расійскім напрамку на 7 працэнтаў да ўзроўню бягучага года, захаванне долі ў расійскім імпарце не ніжэй за 9 працэнтаў. Плануецца, што экспарт у краіны далёкай дугі павялічыцца не менш як на 20 працэнтаў. "Гэты рост будзе забяспечаны за кошт фінансавых механізмаў падтрымкі экспартных указаў нумар 466, нумар 534 і нумар 412. На гэтыя мэты ў бюджэце прадугледжана каля Br370 млн, г.зн. на 20 працэнтаў больш, чым у 2023 годзе", - звярнула ўвагу начальнік упраўлення.