Лукашэнка пра будучы склад УНС: там будуць розныя пункты гледжання, але не будзе ворагаў

Трэба адкрыта і сумленна правесці выбары ў склад Усебеларускага народнага сходу. Аб гэтым Прэзідэнт Беларусі Аляксандр Лукашэнка заявіў на сустрэчы са старшынёй ЦВК Ігарам Карпенкам у час абмеркавання падрыхтоўкі да электаральнай кампаніі, якая мае адбыцца ў 2024 годзе, перадае карэспандэнт БЕЛТА.

 Асобна кіраўнік дзяржавы звярнуў увагу на такую навелу, як фарміраванне Усебеларускага народнага сходу - органа, які па выніках рэферэндуму набыў у Беларусі канстытуцыйны статус.

 "Закладваем пэўны фундамент у гэтай справе. Напрацоўваем вопыт. Трэба вельмі ўважліва да гэтага паставіцца. Вельмі шмат у Канстытуцыі і ў законах вызначана: колькасць, як выбіраць, ад каго выбіраць і гэтак далей. Спрэчак тут няма. Таксама трэба адкрыта і сумленна правесці выбары у склад Усебеларускага народнага сходу, - сказаў кіраўнік дзяржавы. - Там будуць розныя людзі. Там, я ўпэўнены, будуць розныя пункты гледжання. Адзінае, што ворагаў там не будзе. Але нам не патрэбны ворагі. І нашаму грамадству ў тым ліку. А пункты гледжання павінны быць рознымі, каб мы правільна прымалі рашэнне".

 Як паведамлялася БЕЛТА, у Беларусі ў 2024 годзе ўпершыню пройдзе адзіны дзень галасавання. На выбарах будзе не толькі фарміравацца склад парламента, але грамадзяне таксама выберуць дэпутатаў мясцовых саветаў розных узроўняў. Адзіны дзень галасавання прадугледжаны абноўленай Канстытуцыяй. Гэта апошняя нядзеля лютага. Такім чынам, першы адзіны дзень галасавання адбудзецца 25 лютага 2024 года.

 Яшчэ адна асаблівасць - гэта фарміраванне складу Усебеларускага народнага сходу. У Канстытуцыі закладзена, што пасля адзінага дня галасавання не пазней як праз 60 дзён павінна адбыцца першае пасяджэнне Усебеларускага народнага сходу. Такім чынам, апошні дзень для пачатку работы пасяджэння УНС - 25 красавіка.