Шаўцоў: адна данацыя крыві ратуе чатыры чалавечыя жыцці

«Мы папулярызуем донарства, каб людзі разумелі: адна данацыя ратуе чатыры чалавечыя жыцці», — сказаў Дзмітрый Шаўцоў. «Кожны чалавек павінен хаця б раз у жыцці стаць донарам. Мы не ведаем, што з намі здарыцца праз пяць хвілін, дзесяць месяцаў або год. Можа, кроў спатрэбіцца нам, нашым бацькам або нашым дзецям. Таму папулярызаваць донарства крыві мы павінны пастаянна», — упэўнены генеральны сакратар БЧК.

Паводле яго слоў, донарская кроў — стратэгічны запас любой краіны. «Таму папулярызацыяй донарства актыўна займаюцца і сістэма аховы здароўя, і Чырвоны Крыж, і сродкі масавай інфармацыі. Заахвочвае донарства дзяржава. Калі чалавек 20 разоў здаваў кроў бязвыплатна, ён становіцца ганаровым донарам і можа карыстацца ўсімі прывілеямі», — адзначыў Дзмітрый Шаўцоў.

Ён расказаў, што сам штогод 14 чэрвеня бязвыплатна здае кроў. «Для мяне гэта ўжо традыцыя на працягу многіх гадоў. У гэты дзень я адным з першых здаю кроў і потым ужо арганізую мерапрыемствы, а раней проста прыязджаў, каб стаць бязвыплатным донарам. Сённяшні дзень не стаў выключэннем», — паведаміў ён.

Штогод у Сусветны дзень донара Міністэрства аховы здароўя сумесна з Чырвоным Крыжам арганізуе перасовачныя пункты здачы крыві па ўсёй краіне. У Мінску такі пункт разгарнуўся каля будынка Міністэрства аховы здароўя. Прадстаўнікі БЧК дапамагалі праводзіць медыцынскі агляд. Пасля здачы крыві донары маглі адпачыць, выпіць салодкай гарбаты або кавы.

Была арганізавана сумесная выстаўка Беларускага Чырвонага Крыжа і Нацыянальнага гістарычнага музея пад назвай «Стань донарам». Супрацоўнікі Беларускага Чырвонага Крыжа прадаставілі з уласных фондаў архіўныя матэрыялы 60-80-х гадоў мінулага стагоддзя: плакаты, газеты, афішы. З іх дапамогай праводзілася масавая агітацыйная работа сярод насельніцтва, якая папулярызавала бязвыплатную здачу крыві. На выстаўцы сабралі асабістыя кнігі донараў, ганаровыя нагрудныя знакі, пасведчанні, фотаальбомы — усё тое, што так ці інакш датычыцца тэмы донарства. Асобная вітрына прысвечана лаўрэатам узнагароды імя Флорэнс Найцінгейл — яе ўдастоены 15 медсясцёр Беларускага Чырвонага Крыжа. Выстаўка будзе працаваць у музеі да 25 чэрвеня.