МНС Беларусі запускае новую інфармацыйную кампанію "Будзь побач з дзіцем!"

МНС запускае інфармацыйную кампанію "Будзь побач з дзіцем!". Аб гэтым БЕЛТА паведамілі ў Міністэрстве па надзвычайных сітуацыях.

Як адзначылі ў ведамстве, у Беларусі штогод рэгіструюцца выпадкі гібелі і траўматызму дзяцей. Часта прычынай такіх здарэнняў становіцца адсутнасць кантролю з боку дарослых. Каб чарговы раз звярнуць увагу бацькоў на гэту праблему, работнікі Навукова-даследчага інстытута пажарнай бяспекі і праблем надзвычайных сітуацый МНС Беларусі стварылі новую інфармацыйную кампанію "Будзь побач з дзіцем!". Яе рэалізацыя стане новым падыходам у вырашэнні гэтай няпростай задачы.

Галоўная мэта інфармацыйнай кампаніі - паўплываць на няўважлівае стаўленне бацькоў да пытанняў бяспекі дзяцей. Нават калі ў дзіцяці ёсць мабільны тэлефон для сувязі з бацькамі, гэта не заўсёды зможа засцерагчы яго ад небяспекі.

Інфармацыйная кампанія "Будзь побач з дзіцем", накіраваная на папярэджванне гібелі дзяцей пры пажарах і на вадаёмах, стартуе па ўсёй Беларусі ў жніўні. На друкаванай прадукцыі выява тэлефона ў эпіцэнтры трагедыі будзе важным пасылам, што адпавядае слогану кампаніі. Гэты вобраз прыцягне ўвагу мэтавай аўдыторыі да ўзнятай праблемы.

Работнікі МНС падышлі да кампаніі комплексна. Яны стварылі цэлы брэнд-пакет, дзе ўсё накіравана на тое, каб сфакусіраваць увагу бацькоў на бяспецы дзяцей. Для максімальнага пашырэння інфармацыйнай кампаніі ў наваколлі населеных пунктаў з'явяцца яркія білборды. У інтэрнэце і на стэндах з'явяцца лістоўкі з карыснай інфармацыяй. Для бацькоў падрыхтаваны буклеты з правіламі бяспекі.

Акрамя таго, у акварэльным стылі выканана брашура "Энцыклапедыя бяспекі для бацькоў". Яна ў даступнай форме ілюструе віды небяспекі, што падпільноўваюць дзяцей на вуліцы і дома. Брашура дапаможа замацаваць атрыманыя веды наведвальнікам адукацыйных цэнтраў бяспекі, а таксама бацькам, якія будуць прысутнічаць на выступленнях работнікаў МНС у працоўных калектывах.

Такім чынам, ратавальнікі ахопяць максімальную мэтавую аўдыторыі і пастараюцца дастукацца да кожнага з бацькоў з заклікам быць побач з дзіцем, папярэджваючы магчымую трагедыю і навучаючы яго правілам бяспекі.