Мінадукацыі назвала арыенціровачную дату старту прыёмнай кампаніі 2023 года

Прыёмная кампанія 2023 года арыенціровачна стартуе 17 ліпеня. Аб гэтым журналістам паведаміў першы намеснік міністра адукацыі Аляксандр Бахановіч, перадае карэспандэнт БЕЛТА.

Першы намеснік міністра праінфармаваў, што ў бліжэйшы час будуць зацверджаны тэрміны правядзення прыёмнай кампаніі 2023 года. "Будуць вызначаны тэрміны падачы дакументаў на бюджэтную і платную форму навучання, тэрміны правядзення ўступных іспытаў ва ўстановах вышэйшай адукацыі, дзе гэта неабходна, і тэрміны залічэння як на бюджэтную, так і платную форму навучання. Прыкладна тэрміны будуць такія ж, як і ў мінулым годзе, можа, недзе з розніцай некалькі дзён. Прыём дакументаў і старт прыёмнай кампаніі гэтага года арыенціровачна пачнецца 17 ліпеня", - расказаў Аляксандр Бахановіч.

Ён адзначыў, што асноўнай задачай гэтай прыёмнай кампаніі з'яўляецца забеспячэнне роўных, справядлівых і аб'ектыўных умоў для ўсіх абітурыентаў. "Таксама мы павінны стварыць умовы для нашых адораных, таленавітых і матываваных дзяцей для паступлення на вельмі важныя і запатрабаваныя эканомікай краіны спецыяльнасці. Для дасягнення гэтага Міністэрства адукацыі, установы вышэйшай адукацыі, а таксама заказчыкі кадраў праводзяць шэраг мерапрыемстваў, створаны ўнікальныя траекторыі для паступлення", - дадаў першы намеснік міністра.