Міклашэвіч: абноўленая Канстытуцыя з'яўляецца рэальным дагаворам паміж уладай і грамадствам
Роўна год таму, 27 лютага 2022 года, у Беларусі прайшоў рэферэндум па ўнясенні змяненняў і дапаўненняў у Канстытуцыю. Вынікі ўсенароднага галасавання паказалі, што беларусы падтрымліваюць ідэі пашырэння народаўладдзя і ўмацавання дэмакратыі ў краіне, заявіў карэспандэнту БЕЛТА старшыня Канстытуцыйнага Суда Пётр Міклашэвіч.
"Вынікі рэферэндуму сведчаць, што, па-першае, ідэі ўмацавання дэмакратычных асноў грамадства і дзяржавы, развіцця народаўладдзя ўсямерна падтрымліваюцца грамадзянамі нашай краіны; па-другое, захаванне нацыянальнай ідэнтычнасці, культурна-духоўных традыцый і каштоўнасцей ляжыць у аснове далейшага развіцця Беларусі без усялякіх рэвалюцыйных узрушэнняў", - сказаў Пётр Міклашэвіч.
Абноўленая Канстытуцыя стала фундаментам нашага далейшага эвалюцыйнага развіцця, паколькі ў гэтым дакуменце былі ўлічаны многія прапановы, якія прагучалі ў час маштабнага абмеркавання законапраекта з прадстаўнікамі ўсіх слаёў насельніцтва. Рэферэндум аб змяненні Канстытуцыі прадэманстраваў гатоўнасць грамадства і ўлады шукаць і знаходзіць кампрамісы па пытаннях удасканалення палітычнай сістэмы дзяржавы ў адпаведнасці з актуальнымі выклікамі часу.
Дзякуючы прыняццю абноўленага Асноўнага закона ў краіне з'явіўся новы орган улады Усебеларускі народны сход, надзелены шырокімі паўнамоцтвамі, у тым ліку правам выбіраць кіраўніка і членаў ЦВК, Канстытуцыйнага і Вярхоўнага судоў, уводзіць на тэрыторыі краіны рэжым надзвычайнага або ваеннага становішча.
"Абноўлены Асноўны закон краіны з'яўляецца сапраўды рэальным дагаворам паміж уладай і грамадствам аб удасканаленні палітычнай сістэмы дзяржавы, адлюстроўвае імкненне і жаданне беларускага народа мірна і стабільна на канстытуцыйнай аснове развіваць сваю краіну", - адзначыў Пётр Міклашэвіч.
Ён таксама падкрэсліў, што шырокая народная падтрымка абноўленай Канстытуцыі паказала высокі давер людзей да ўлады, праводзімага Прэзідэнтам курсу па забеспячэнні суверэнітэту і незалежнасці Рэспублікі Беларусь.
