Конкурс навукова-тэхнічнай творчасці навучэнцаў СД пройдзе ў дзіцячым тэхнапарку 24-30 верасня

Конкурс навукова-тэхнічнай творчасці навучэнцаў Саюзнай дзяржавы "Таленты XXI стагоддзя" пройдзе на базе Нацыянальнага дзіцячага тэхнапарка з 24 па 30 верасня. Аб гэтым карэспандэнту БЕЛТА паведаміла намеснік дырэктара ўстановы Таццяна Шыбіцкая.

"У сувязі з укараненнем новых напрамкаў у тэхнічнай творчасці з'явіўся шэраг новых рэспубліканскіх мерапрыемстваў з удзелам дзяцей і моладзі. Напрыклад, злёт вынаходцаў і рацыяналізатараў, конкурс інавацыйнай і тэхнічнай творчасці HI-ТЕСН, конкурс навукова-тэхнічнай творчасці навучэнскай моладзі "ТэхнаІнтэлект", спартакіяда па тэхнічных відах спорту "ТэхнаСпорт" і многія іншыя. На базе дзіцячага тэхнапарка з 24 па 30 верасня будзе праведзены VII конкурс навукова-тэхнічнай творчасці навучэнцаў Саюзнай дзяржавы "Таленты XXI стагоддзя", на які для ўдзелу з 15 рэгіёнаў Расіі і ўсіх рэгіёнаў Беларусі з'едуцца больш за 300 таленавітых маладых людзей. Конкурс стаў паспяховым праектам Пастаяннага камітэта Саюзнай дзяржавы, Міністэрства адукацыі Беларусі, Міністэрства адукацыі і навукі Расіі", - расказала Таццяна Шыбіцкая.

У масавых мерапрыемствах тэхнічнага і спартыўна-тэхнічнага напрамку штогод прымаюць удзел каля 15 тыс. навучэнцаў, на рэспубліканскіх этапах - каля 3 тыс. "Што датычыцца работы з адоранымі дзецьмі, у Нацыянальным дзіцячым тэхнапарку работа такая вядзецца з 1 студзеня 2020 года. Цяпер установай праведзена ўжо 25 адукацыйных змен для адораных дзяцей і моладзі, у рамках якіх навучанне ў Нацыянальным дзіцячым тэхнапарку прайшлі больш за 2 тыс. навучэнцаў. Яны вучыліся па 15 напрамках, якія рэалізуюцца ў нас, а таксама ўдзельнічалі не толькі ў навучальнай дзейнасці, але і ў выхаваўчых мерапрыемствах", - праінфармавала намеснік дырэктара тэхнапарка.