ДАІ ўзмоцніць кантроль за бяспекай удзельнікаў дарожнага руху 15-24 верасня

У сувязі са скарачэннем светлавога дня ДАІ з 15 па 24 верасня праводзіць прафілактычныя мерапрыемствы па забеспячэнні бяспекі ўдзельнікаў дарожнага руху. Аб гэтым БЕЛТА паведамілі ў галоўным упраўленні ДАІ МУС.

Асаблівую ўвагу вартавыя дарог удзеляць папярэджанню ДТЗ у цёмны час сутак. Супрацоўнікі ДАІ давядуць да насельніцтва правілы бяспечных паводзін, у тым ліку пры руху на веласіпедах і сродках персанальнай мабільнасці. Інспектары не абыдуць увагай і тэму бяспекі на пешаходных пераходах. З улікам сезоннага фактару яны нагадаюць аб неабходнасці і правілах выкарыстання святловяртальных элементаў.

У час правядзення акцыі запланаваны рэйдавыя мерапрыемствы па адпрацоўцы найбольш аварыйна небяспечных участкаў дарог і пешаходных пераходаў. Веласіпедысты і пешаходы, якія парушаюць правілы дарожнага руху, будуць прыцягвацца да адказнасці. Акрамя таго, супрацоўнікі ДАІ пракантралююць выкананне скорасных рэжымаў і правілы праезду пераходаў вадзіцелямі.

У ДАІ адзначылі, што з пачатку года на дарогах краіны ў ДТЗ загінулі 79 пешаходаў і 20 веласіпедыстаў. Кожны пяты з іх знаходзіўся ў нецвярозым выглядзе. У выпадку выяўлення на дарозе нецвярозых пешаходаў і веласіпедыстаў просьба паведамляць іх каардынаты па тэлефоне 102 для своечасовага прыняцця мер.