У Докшыцкім раёне адсвяткавалі Дзень Перамогі
Раніцай 9 Мая на мемарыяльным комплексе "Шунеўка" з удзелам кіраўніцтва раёна, дэпутацкага корпуса, духавенства, прадстаўнікоў працоўных калектываў, грамадскіх арганізацый прайшоў мітынг памяці "У імя жыцця на зямлі" з ускладаннем кветак і вянкоў да мемарыяла.
На плошчы І.С. Палявога адбыўся ўрачысты мітынг "Мы памятаем! Мы ганарымся!".
Усіх жыхароў і гасцей Докшыцкага раёна з Днём Перамогі павіншавалі старшыня Докшыцкага райвыканкама Сяргей Абірала, дэпутат Палаты прадстаўнікоў Нацыянальнага сходу Рэспублікі Беларусь Анатоль Сіўко і навучэнка сярэдняй школы №1 г. Докшыцы Аляксандра Елісеенкf.
У мітынгу прыняў удзел ветэран Вялікай Айчыннай вайны Уладзімір Бурдыка.
Старшыня Докшыцкага раённага выканаўчага камітэта Сяргей Абірала: — Паважаныя жыхары Докшыцкага раёна! Усведамляючы сябе спадчыннікамі народа-пераможцы, мы павінны памятаць аб тым, што зараз мы нясем сваю долю адказнасці за лёс свайго раёна, свайго краю, сваёй краіны. Сёння як ніколі нам неабходна вера і вернасць нашым патрыятычным традыцыям. У гэты светлы святочны дзень прыміце шчырыя пажаданні моцнага здароўя, дабрабыту, міру, дабра і шчасця. Няхай Перамога і памяць аб ёй будуць заўсёды з намі - у сэрцах, у добрых пачынаннях, у пастаянным і штодзённым клопаце аб старэйшым пакаленні! Са святам, дарагія землякі! З Днём Перамогі!
Дэпутат Палаты прадстаўнікоў Нацыянальнага сходу Рэспублікі Беларусь па Докшыцкай выбарчай акрузе Анатоль Сіўко: — Сёння па загадзе душы і сэрца мы кланяемся загінуўшым землякам каля абеліскаў і мемарыялаў, помнікаў і брацкіх магіл, ускладаем кветкі. Упэўнены: гэтыя традыцыі будуць працягваць нашы дзеці, унукі і праўнукі. Мы нікому не дазволім перапісаць старонкі нашай гісторыі і будзем імкнуцца быць годнымі нашых герояў, якія не шкадавалі сябе ў імя гонару і славы Айчыны. 9 Мая – гэта яшчэ і ўвасабленне сілы і адзінства нашага народа, нашай краіны.
Днём у кінаканцэртнай зале "Іскра" прайшоў святочны тэатралізаваны канцэрт "Табе, Перамога, прысвячаем!". А ўвечары на гарадской плошчы адбыўся канцэрт «У 6 гадзін вечара пасля вайны».
