Прафсаюзы правяраюць гатоўнасць сельгаспрадпрыемстваў да веснавых палявых работ
Прафсаюзныя спецыялісты вывучаць цэлы спектр пытанняў, якія датычацца аховы працы. Гэта правядзенне інструктажоў, забеспячэнне перадрэйсавых і паслярэйсавых медыцынскіх аглядаў вадзіцеляў і механізатараў, гатоўнасць сельскагаспадарчай тэхнікі, санітарна-бытавыя ўмовы, забеспячэнне гарачым харчаваннем, медыцынскімі аптэчкамі месц работы з пестыцыдамі і мінеральнымі ўгнаеннямі і многае іншае.
“Гатоўнасць да пасяўной кампаніі для тэхнічнай інспекцыі прафсаюзаў вызначаецца ў першую чаргу створанымі ўмовамі працы, а не ўмовамі надвор'я. Так, наймальнікі імкнуцца забяспечыць працаўнікам камфорт і бяспеку. Але разам з тым з году ў год мы выяўляем дастатковую колькасць парушэнняў. Напрыклад, летась падчас маніторынгаў выдадзена больш за 350 рэкамендацый на ўстараненне больш як 3 тысяч парушэнняў заканадаўства аб ахове працы, - распавёў галоўны тэхнічны інспектар працы Федэрацыі прафсаюзаў Павел Манько. - Наша задача праверыць умовы, у якіх працуюць людзі. Пры выяўленні парушэнняў прыняць усе неабходныя меры па іх аператыўным устараненні. Нярэдкія выпадкі, калі і самі работнікі грэбуюць правіламі і нормамі ў сферы аховы працы і атрымліваюць вытворчую траўму. Таму прафсаюзныя інспектары пры наведванні сельгаспрадпрыемстваў працуюць як з наймальнікамі, гэтак і з работнікамі. І калі ёсць пытанні, то заўсёды ахвотна тлумачаць усе нюансы».
Па выніках праведзеных маніторынгаў тэхнічная інспекцыя працы выдае наймальнікам рэкамендацыі з устаноўленымі тэрмінамі ўстаранення выяўленых парушэнняў. Аб іх устараненні яны абавязаны інфармаваць прафсаюзы.
Нагадаем, што паведаміць аб парушэннях нормаў і правілаў аховы працы можна таксама па тэлефоне "гарачай лініі" Федэрацыі прафсаюзаў Беларусі - 8 (017) 374 90 48.
Крыніца з фота: https://www.dokshitsy.by/2023/03/gotovnost-selxozpredpriyatij-k-vesenne/