25 июня 2025

Лучшую сандружину определили в Докшицком районе

У сярэдняй школе № 1 г. Докшыцы імя І.С. Палявога прайшлі раённыя спаборніцтвы санітарных фарміраванняў грамадзянскай абароны. Удзел у іх прынялі пяць каманд – прадстаўнікі Докшыцкага хлебазавода, ААТ “Завод “Ветразь”, Бягомльскага лясгаса, філіяла аблспажыўтаварыства і РУП ЖКГ “Докшыцы-камунальнік”.

Санітарным звёнам неабходна было прайсці некалькі этапаў і прадэманстраваць свае веды і навыкі. Напрыклад, умець надзяваць процівагаз, карыстацца насілкамі, індывідуальнай аптэчкай, а таксама падручнымі сродкамі аказання медыцынскай дапамогі.

Каманды працавалі таксама ў ачагах хімічнага і камбінавага паражэння. На гэтых участках яны вынасілі паражоных і змяшчалі іх у транспартныя сродкі, праводзілі санітарную апрацоўку. Не менш адказнай была работа і ў ачагу інфекцыйнага захворвання, дзе трэба было зрабіць адбор пробы вады, глебы і прадуктаў харчавання на далейшае даследаванне. Таксама прыгатаваць растворы для дэзінфекцыі аб’ектаў.

Па выніках спаборніцтваў найменш штрафных балаў набрала каманда РУП ЖКГ “Докшыцы-камунальнік”, якая і заняла першае месца. Дыпломы другой і трэцяй ступеняў атрымалі санітарныя фарміраванні хлебазавода і лясгаса адпаведна.

Лепшым камандзірам звяна прызнана Вольга Сялюк (Бягомльскі лясгас), а лепшым сандружыннікам стаў Аляксандр Роўба (філіял аблспажыўтаварыства).

Начальнік РАНС Віктар Кужэль павіншаваў пераможцаў і ўручыў заслужаныя ўзнагароды.

Таццяна ПАДБЯРЭЗКАЯ.
Фота Вячаслава ЧАРВІНСКАГА.

dokshitsy.by