Лукашэнка пра сітуацыю з ПВК Вагнер - не трэба нікога саджаць, трэба астыць і перагарнуць гэту старонку

27 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка лічыць неабходным пасля спробы ўзброенага мяцяжу ПВК "Вагнер" астыць і пастарацца перагарнуць гэту старонку, а не заклікаць да жорсткіх мер. Аб гэтым ён заявіў, раскрываючы падрабязнасці перагавораў 24 чэрвеня з кіраўніком ПВК Яўгенам Прыгожыным і матывы свайго актыўнага ўдзелу ва ўрэгуляванні сітуацыі, перадае карэспандэнт БЕЛТА.

"Галоўнае, паважаныя сябры, гэта выснова і ўрокі, як я заўсёды гавару. Выснова: гэта была б вайна на два фронты. Гэта не Прыгожын. Прыгожын - спускавы кручок. Пачалася б гэта смута па ўсёй Расіі. І гэта быў бы адкрыты другі фронт. І тут сапраўды, як у час грамадзянскай вайны. Яшчэ раз паўтараю, і гэта самая галоўная выснова: ні Пуцін, ні Лукашэнка не героі. Мы рабілі сваю работу. Але шмат чаго ўпусцілі. І нават не ўпусцілі, а не надалі значэння гэтаму, - сказаў Прэзідэнт. - Цяпер нікога не трэба саджаць. Гэта я проста звяртаюся да расіян - ура-агітатараў і патрыётаў. Не трэба нікога цяпер саджаць, не трэба нікога расстрэльваць. Трэба астыць і перагарнуць гэту старонку. Прыйдзе час, калі будзе неабходна, вернемся да гэтай гісторыі. Але цяпер трэба астыць. Не трэба ўскладняць абстаноўку і некага папракаць".

Паводле слоў Аляксандра Лукашэнкі, цяпер вельмі няпросты час: "Давайце будзем зыходзіць з таго, што гэта толькі пачатак. А хто з вас цяпер устане і скажа, што ўсё, закончана, пойдзем рукі мыць, абедаць, выпіваць? Ніхто не скажа. Давайце будзем зыходзіць з горшага, што нас чакае няпросты час. Убачыўшы гэта, заходнікі - яны таксама зробяць пэўныя высновы, і для іх будзе ўрок. Яны скаардынуюць сваю работу, сканцэнтруюць і будуць наносіць удары па самых балючых месцах. І нам трэба, як учора Пуцін сказаў, сапраўды адзінства нашага грамадства. Таму час няпросты".

Прэзідэнт упэўнены, што сітуацыя, якая здарылася, - гэта ўрок усім. "Нам трэба быць больш уважлівымі да такіх ваенных калектываў, калі мы іх спарадзілі, як, дапусцім, ПВК "Вагнер" і іншыя. І нам трэба своечасова рэагаваць на іх просьбы і запыты. Своечасова сустракацца. Іх таксама трэба арыентаваць і падтрымліваць. Гэта вялікі ўрок", - сказаў ён.