Беларусь сур'ёзна занепакоена маніпуляваннем "дзіцячым парадкам дня" ў ААН

Беларусь сур'ёзна занепакоена маніпуляваннем "дзіцячым парадкам дня" ў ААН. Аб гэтым заявіў намеснік пастаяннага прадстаўніка Беларусі пры ААН Павел Яўсеенка на пасяджэнні Савета Бяспекі ААН па формуле Арыі "Барацьба з прымусовым разлучэннем і незаконнай эксплуатацыяй дзяцей", паведамілі БЕЛТА ў пастаянным прадстаўніцтве.

"Дзеці заўсёды становяцца першымі ахвярамі вайны. Беларусь сур'ёзна занепакоена згубным і шырокамаштабным уздзеяннем узброеных канфліктаў на дзяцей, а таксама іх доўгатэрміновымі наступствамі для ўстойлівага міру, бяспекі і развіцця", - падкрэсліў дыпламат.

Ён звярнуў увагу, што Беларусь надае важнае значэнне рабоце офіса спецыяльнага прадстаўніка генеральнага сакратара ААН па пытанні аб дзецях і ўзброеных канфліктах у справе ўзмацнення абароны дзяцей, якія пацярпелі ў выніку ўзброенага канфлікту, павышэння дасведчанасці, збору інфармацыі аб становішчы такіх дзяцей і развіцця міжнароднага супрацоўніцтва для ўдасканалення мер іх абароны.

"Беларусь застаецца цалкам прыхільнай да справы абароны дзяцей ва ўзброеных канфліктах і паслядоўна ўносіць свой уклад у паляпшэнне гуманітарнай сітуацыі ў свеце", - заявіў Павел Яўсеенка. Ён нагадаў, што на працягу дзесяцігоддзяў існуе традыцыя запрашаць у Беларусь для адпачынку і аздараўлення дзяцей з краін, закранутых рознымі бедствамі. Пачынаючы з 1991 года ў гэтых мэтах нашу краіну наведалі больш за 21 тыс. дзяцей з больш як 40 краін.

"Беларусь сур'ёзна занепакоена маніпуляваннем "дзіцячым парадкам дня" ў ААН і вельмі расчаравана палітызацыяй гуманітарнай дзейнасці Беларусі па арганізацыі адпачынку для дзяцей з замежных краін у беларускіх аздараўленчых установах, - падкрэсліў намеснік пастаяннага прадстаўніка. - Гэта пытанне стала прадметам спекуляцый з боку некаторых еўрапейскіх палітычных і дзяржаўных дзеячаў".

Пры гэтым яны не прыводзяць ніводнага канкрэтнага факта, ніводнага імя дзіцяці, якое было б насільна перамешчана ў Беларусь або не пакінула яе тэрыторыю пасля адпачынку і аздараўлення.

"Мы не прымаем спробы зламыснага скажэння фактаў і іх вольных інтэрпрэтацый", - заявіў Павел Яўсеенка. Паводле яго слоў, у Беларусі будуць рады прыняць прадстаўнікоў ААН з візітам.

Акрамя таго, раней быў праведзены брыфінг для дыпламатычнага корпуса, акрэдытаванага ў нашай краіне, для растлумачэння фармату такой работы адбылася азнаямленчая паездка дыпламатаў у месцы адпачынку і аздараўлення дзяцей. "Усе тыя, хто хацеў упэўніцца ў законнасці і абгрунтаванасці гуманітарных намаганняў нашай краіны, мелі для гэтага ўсе магчымасці", - акцэнтаваў увагу дыпламат.

Беларусь з'яўляецца адказным удзельнікам Канвенцыі аб правах дзіцяці і факультатыўных пратаколаў да яе і аказвае дзецям дапамогу, кіруючыся выключна гуманітарнымі меркаваннямі і агульначалавечымі каштоўнасцямі, падкрэсліў намеснік пастаяннага прадстаўніка.

"Мы будзем рады прадэманстраваць усім зацікаўленым тое, як гэта работа арганізавана ў нашай краіне, - дадаў ён. - Карыстаючыся выпадкам, хацеў бы запэўніць у гатоўнасці беларускага боку ўмацоўваць узаемадзеянне з ЮНІСЕФ і іншымі ўстановамі і структурамі ААН у мэтах забеспячэння інтарэсаў дзіцяці".