"Прэзідэнтам пастаўлена задача, каб ніхто не пазбегнуў адказнасці". Крутой пра пажар у ГЦ у Віцебску

Пажар у ГЦ "Беларусь" у Віцебску знаходзіцца на асаблівым кантролі Прэзідэнта Беларусі Аляксандра Лукашэнкі, заявіў журналістам кіраўнік Адміністрацыі Прэзідэнта Дзмітрый Крутой, перадае карэспандэнт БЕЛТА.

"Учора, у суботу, адбылася тэлефонная размова з Прэзідэнтам нашай краіны. Нягледзячы на замежную камандзіроўку наш лідар трымае руку на пульсе па рэзанансных выпадках. Таму было даложана аб арганізацыі работ па ліквідацыі наступстваў пажару ў гандлёвым цэнтры ў горадзе Віцебску. Гэта адзін з буйнейшых пажараў у Віцебскай вобласці за апошні час. Зразумела, гэты выпадак знаходзіцца на асаблівым кантролі нашага лідара, - сказаў Дзмітрый Крутой. - Было даручана, каб Адміністрацыя Прэзідэнта каардынавала работу ўсіх адпаведных службаў і дзяржаўных органаў, максімальна сумленна, адкрыта і аб'ектыўна праведзена было расследаванне, высветлены былі ўсе прычыны. Арганізавана ліквідацыя ўсіх наступстваў. Асаблівую ўвагу наш лідар удзяліў хутчэйшай рэабілітацыі пацярпелых. Міністр аховы здароўя неадкладна быў накіраваны ў Віцебск літаральна ноччу і знаходзіўся непасрэдна ў бальніцах, сустракаўся з пацярпелымі пацыентамі і забяспечвае кожную раніцу адпаведныя даклады".

На 15 снежня колькасць пацярпелых - 20 чалавек. "16 непасрэдна ў дзень пажару і 4 чалавекі звярнуліся потым за псіхалагічнай дапамогай. Адна жанчына знаходзіцца ў рэанімацыі ў цяжкім стане. Удалося гэты стан стабілізаваць, але тым не менш яна на сённяшні дзень падключана да апарата ШВЛ. Былі накіраваны з рэспубліканскага ўзроўню, нашых цэнтраў адпаведныя брыгады таксіколагаў і рэаніматолагаў. Яны праводзяць усе адпаведныя працэдуры і забяспечваюць пратаколы лячэння. Стан двух пацярпелых палепшыўся і іх жыццю нічога не пагражае, і мы спадзяёмся ў хуткім часе іх перавесці ў звычайныя аддзяленні тэрапіі. З дзяцей дзве пацярпелыя дзяўчынкі - лёгкая форма. Адна падвярнула ножку, другую мы на ўсялякі выпадак паклалі ў рэанімацыю, але таксама перавялі ўжо ў педыятрычнае аддзяленне. Яна ўжо нават намалявала нашаму міністру аховы здароўя малюнкі, павіншавала яго з Новым годам!" - адзначыў кіраўнік Адміністрацыі Прэзідэнта.

"Па прычынах. Следчы камітэт узбудзіў крымінальную справу пакуль па артыкуле Крымінальнага кодэкса, які адносіцца да парушэння правіл пажарнай бяспекі. Магчыма, кваліфікацыя будзе пашырана па меры паступлення ўсіх матэрыялаў і правядзення адпаведных экспертыз, - падкрэсліў Дзмітрый Крутой. - Заўтра ў Віцебску ў нас адбудзецца штаб з усімі зацікаўленымі сілавымі ведамствамі: Міністэрства ўнутраных спраў, Следчы камітэт, Дзяржаўны камітэт судовых экспертыз і Міністэрства па надзвычайных сітуацыях. Па лініі кожнай з гэтых службаў ёсць адпаведныя пытанні. Прэзідэнтам пастаўлена задача, каб ніхто не пазбегнуў адказнасці, усе вінаватыя, безумоўна, былі прыцягнуты да адпаведнай адказнасці ў рамках нашага заканадаўства. І на будучае мы, вядома, павінны папярэдзіць узнікненне падобных выпадкаў".

БелТА