Праваахоўнікі ў час святкавання Дня Незалежнасці будуць несці службу ва ўзмоцненым рэжыме

Праваахоўнікі ў час святкавання Дня Незалежнасці будуць несці службу ва ўзмоцненым рэжыме, паведаміў журналістам начальнік упраўлення аховы правапарадку Міністэрства ўнутраных спраў Сяргей Мірончык, перадае карэспандэнт БЕЛТА.

"У сувязі са святочнымі мерапрыемствамі Міністэрствам унутраных спраў у межах кампетэнцыі праводзяцца падрыхтоўчыя работы па забеспячэнні грамадскай бяспекі. Для выканання ўскладзеных на органы ўнутраных спраў задач рэалізуецца комплекс неабходных прафілактычных мерапрыемстваў. Асабовы склад органаў унутраных спраў будзе пераведзены на ўзмоцнены варыянт нясення службы. Праведзены неабходныя разлікі сіл і сродкаў", - расказаў Сяргей Мірончык.

Напярэдадні свята міліцыянеры будуць кантраляваць месцы правядзення масавых мерапрыемстваў. "Пляцоўкі, дзе чакаецца значная колькасць грамадзян будуць правераны сапёрна-піратэхнічнымі групамі. Для арганізацыі прапускнога рэжыму будзе абсталявана дастатковая колькасць кантрольна-прапускных пунктаў, у тым ліку асобна для інвалідаў, ветэранаў, цяжарных жанчын. Перад кожным пунктам пропуску будзе размешчаны стэнд з інфармацыяй аб прадметах і рэчывах, якія забаронена праносіць. У мэтах належнага забеспячэння бяспекі і аператыўнага рэагавання на любыя сітуацыі прадугледжана нясенне службы не толькі ў форменным абмундзіраванні, але і ў цывільным адзенні", - адзначыў начальнік упраўлення.

"На прылеглай да святочных лакацый тэрыторыі будзе абмежаваны рух транспартных сродкаў. Пры гэтым прадугледжаны аб'язныя маршруты. Інфармацыя аб уводзімых абмежаваннях будзе прадастаўлена ў сродках масавай інфармацыі. Пры павелічэнні пасажырапатоку на чыгуначным транспарце міліцыянеры прымуць дадатковыя меры па забеспячэнні правапарадку", - дадаў Сяргей Мірончык.