У Докшыцкім раёне працуюць музычныя класы

У дзіцячых школах мастацтваў у Докшыцах, Бягомлі і Крулеўшчыне больш за 500 навучэнцаў авалодваюць музычным, харэаграфічным, выяўленчым і тэатральным мастацтвам. У некаторых іншых аграгарадках працуюць музычныя класы.

Напрыклад, на базе Сітцаўскай СДК клас гульні на акардэоне. Юныя мясцовыя жыхары Крысціна Петух, Анастасія Цягуновiч і браты Улад і Анатоль Навіцкія два разы на тыдзень спяшаюцца на заняткі да настаўніка Докшыцкай ДШМ імя Н. Сакалоўскага Алегу Жаўткевічу.

У Парплiшчанскiм СДК вучыць гульні на цымбалах Алена Трус.

- Гэты струнны ўдарны музычны інструмент адзін з самых старажытных і распаўсюджаных у свеце, - кажа Алена Рыгораўна. - Некаторыя памылкова думаюць, што на цымбалах граюць выключна жанчыны. Але гэта не так. Адным з самых выбітных цымбалістаў у гісторыі з'яўляецца венгерскi музыкант Аладар Рац, які першым прадставіў гэты інструмент у сімфанічным аркестры. Дарэчы, сярод сямі маіх парплiшчанскiх вучняў ёсць і хлопчык - Максім Вайцяшонак.

Фартэпіяна ў Параф'янава і Тумілавічах выкладае Аляксандр Буката. Дарэчы, у Тумілавічах адзін з самых вялікіх сельскіх музычных класаў: восем вучняў з задавальненнем авалодваюць клавішным інструментам і актыўна ўдзельнічаюць у мастацкай самадзейнасці.

Яўгенiя Малевіч.

Крыніца: https://www.dokshitsy.by/2021/04/muzykalnye-klassy/