У Докшыцкім раёне прайшоў турзлёт

Прыціхлы з пазалеташняга года бераг возера Медзазол у гэтым годзе зноў абудзілі турысты. У раённым турыстычным злёце моладзі-2021 удзельнічалі прадстаўнікі з 27 арганізацый і прадпрыемстваў, якія аб'ядналіся ў 15 каманд. галоўны кубак пераможца, як і ў мінулы раз, атрымалі камунальнікі. У прызёрах - аддзел па адукацыі райвыканкама і зборная Крулеўшчынскага сельсавета.

Пакуль адны члены каманд разбівалі лагер, іншыя ўжо спяшаліся на першае выпрабаванне - турысцка-прыкладное мнагабор'е ў тэхніцы пешаходнага турызму. У ім трэба было не толькі справіцца з турыстычнай экіпіроўкай, але і прайсці этапы без штрафных балаў. Як ніколі, шмат жадаючых удзельнічала ў спаборніцтвах па стральбе з пнеўматычнай вінтоўкі. Адцягнуць увагу стралкоў змог толькі агульны збор на ўрачыстае адкрыццё турыстычнага свята. З прывітальным словам да ўсіх прысутных звярнуўся старшыня райвыканкама Алег Кавалёнак, які шчыра пажадаў усім выдатнага адпачынку і яднання каманд.

Конкурс мастацкай самадзейнасці, як заўсёды, чымсці нагадваў «музыкалку» КВЗ. Выкананне вядомых песень, перакладзеных на турыстычны лад, актыўна падтрымлівалі гледачы. Выступоўцы імкнуліся здзівіць і заваяваць журы не толькі вакальным майстэрствам, але і ўменнем гуляць на музычных інструментах, сваімі акцёрскімі здольнасцямі. У паказаных інтэрмедыях ў турыстычныя паходы ішлі прынцэсы і каралі, чалавечымі галасамі казалі лясныя жывёлы. Побач з бацькамі на імправізаваную сцэну выходзілі іх дзеці, якія таксама з задавальненнем спявалі ці танчылі, як, напрыклад, Ваня Лежневiч, чый танец, безумоўна, стаў «фішкай» вечара.

Вельмі насычаным на конкурсныя заданні стаў другі дзень. Яркае суботняе сонца шчыра вітала ўдзельнікаў кантрольна-турыстычнага маршруту. Знайсці патрэбную дарогу па компасе і пераадолець пяць кіламетраў па лясных сцежках, не заўсёды пратаптаных, - задача не з лёгкіх. Галоўнае тут не згубіцца, каб потым не марнаваць каштоўны час на доўгія пошукі пікету, на што ў некаторых каманд пайшла не адна гадзіна. Натуральныя і штучныя перашкоды праходзілі веласіпедысты. Гучна балелі за валейбалістаў многія аматары папулярнай у докшычан гульні з мячом. А ля вогнішчаў у кожным лагеры завіхаліся кухары: у кацялках кіпела вуха, смажыўся шашлык, падрумяньвалася рыба. Конкурс турыстычных страў - гэта не проста спаборніцтва, а асаблівае кулінарнае свята, бо ўразіць журы трэба не толькі густам, але і знешнім выглядам стравы, яго назвай і мастацкай падачай. А гэта зноў песні і жарты. Адным словам, пазітыў.

Крыніца: https://www.dokshitsy.by/2021/06/proshel-turslet/