У Докшыцкім раёне пачалася нарыхтоўка зялёных кармоў

Палова сельгаспрадпрыемстваў раёна - ААТ "Таргуны", ААТ "Барсучанка", ДП "АграСітцы" і КУП "Докшыцкі" - пачала нарыхтоўку кармоў. Згодна з планам, першым укосам трэба ўбраць травы на 12 200 гектарах.

Амаль палова ўсіх плошчаў, 4960 гектараў, належыць найбуйнейшай гаспадарцы - ААТ "Таргуны", якое першым аператыўна памяняла плугі, дыскатары і пасяўныя агрэгаты на косы, граблі і прэс-падборшчыкі. Халодныя красавік і травень не вельмі паспрыялі буянаму росту травы, але аграрыі спадзяюцца, што цёплыя дзянькі, якімі нарэшце стала цешыць нас лета, не стануць кароткачасовай з'явай, і сітуацыя паступова выправіцца.

Па стане на раніцу восьмага чэрвеня ў гаспадарцы траў было скошана на 218 гектарах. Работы вяліся трэці дзень на палях паміж Гандлярамі і Плітніцай агульнай плошчай 230 гектараў. На трактары МТЗ-3522 з касілкай васьміметровага захопу NOVACAT-8 працаваў механізатар Андрэй Ганус. На падборцы паспявалі Пётр Кавалёў і Вячаслаў Аніковіч, а адвозілі зялёную масу Сяргей Пецько і Дзмітрый Ралавец на магутных Fendt-730 і Fendt-936.

- Быў бы фронт работ, а мы, не прывыкаць, справімся, - запэўнілі механізатары.

90 300 тон сенажу, 90 800 тон сіласу, 5600 тон сена неабходна нарыхтаваць сельгаспрадпрыемствам раёна, каб забяспечыць грамадскі статак кармамі на зімова-стойлавы перыяд, - гэта 53 400 тон кармавых адзінак, або 30 цэнтнераў кармавых адзінак на ўмоўную галаву жывёлы.

Алена нясцяронка.

Фота Вячаслава Чарвінскага.