Камітэт дзяржкантролю аказаў дапамогу Докшыцкім медыкам

У гэты складаны для краіны час медыкі і ўстановы аховы здароўя маюць патрэбу ў падтрымцы. Многія калектывы і сотні грамадзян спяшаюцца ім на дапамогу.

Наш раён наведаў старшыня Камітэта дзяржаўнага кантролю Рэспублікі Беларусь Леанід Анфімаў. Леанід Васільевіч перадаў 200 камплектаў супрацьэпідэмічных касцюмаў для докшыцкiх медыкаў, якія сёння стаяць на перадавой у барацьбе з каранавiруснай інфекцыяй. Выказаў высокія словы падзякі за іх неймаверную працу і прафесіяналізм.

- Беларусь не здалася перад каранавiрусам, - сказаў Леанід Анфімаў. - А гэта значыць, нам трэба вучыцца працаваць, захоўваючы рэкамендаваныя меры засцярогі. Трэба сказаць, што наша медыцына падрыхтавана да аказання дапамогі пацыентам. Ёсць неабходнае абсталяванне, сродкі абароны і правільная методыка лячэння.

Леанід Анфімаў падкрэсліў, што сёння для ўсіх работнікаў сістэмы аховы здароўя важней за ўсё - падтрымка ад насельніцтва. Яна заключаецца і ў добрым слове, і ў пасільнай дапамозе: ад гарачых абедаў да закупкі сродкаў абароны.

- Докшыцкі раён адным з першых у рэспубліцы апынуўся ў нялёгкай сітуацыі, - пракаментаваў эпідэміялагічную абстаноўку ў раёне старшыня райвыканкама Алег Кавалёнак. - У першыя дні красавіка, калі ў бальніцу пачалі паступаць дзясяткі чалавек з запаленнем лёгкіх, адразу пачалі прымацца экстраныя меры. Былі адменены ўсе масавыя мерапрыемствы, спынена праца рынкаў, ва ўстановах і гандлёвых аб'ектах уведзены дыстанцыйны рэжым. Значную дапамогу раёну аказала абласное ўпраўленне аховы здароўя. Быў перададзены апарат штучнай вентыляцыі лёгкіх, медыкаменты і неабходныя сродкі абароны для медперсаналу. У аптэчнай сетцы раёна ў наяўнасці ёсць каля 20 тысяч масак. Акрамя гэтага, іх сталі шыць і некаторыя працоўныя калектывы. За ўвесь перыяд захворвання на COVID-19 для продажу і асабістых патрэб пашыта 6500 масак.

Больш за сотню чалавек ужо вылечаны і знаходзяцца дома пад наглядам лекараў. Каля 200 чалавек - кантакты першага ўзроўню - самаізалявалiся.

Нягледзячы на ​​многія карэктывы, якія ўнёс каранавiрус ў звыклы лад жыцця, раён завяршае пасяўную кампанію. Гаспадаркі прыступілі да сяўбы кукурузы і яравога рапсу. Падчас паездкі Леанід Анфімаў наведаў некаторыя сельгаспрадпрыемствы раёна, пацікавіўся справамі працаўнікоў палёў.

Таццяна ПАДБЯРЭЗКАЯ.