Адрас: 211722, г.Докшыцы,
вул.Ленінская, д.31
Прыёмная:
8 (02157) 3-25-10 з 8.00 да 17.00
Факс:
8 (02157) 3-25-11
Электронная пошта райвыканкама:
rikdok@vitebsk.by
Старэйшы пажарны інспектар Юрый Пацес ў райаддзеле МНС працуе з 2012 года, але трапіў сюды, прызнаецца, выпадкова.
- Пасля школы скончыў вышэйшы авіяцыйны каледж, затым служыў у арміі, - кажа Юрый. - Марыў, вядома, працаваць у аэрапорце, бо спецыяльнасць авіядыспетчара дазваляла гэта рабіць. Аднак перамагло жаданне жыць на малой радзіме. Таму, калі даведаўся, што патрэбен радыётэлефаніст ў ПАВЧ № 2 у Бягомлі, вырашыў паспрабаваць уладкавацца туды. Потым вучыўся ўжо завочна па лініі пажарнай службы.
Эфектыўнасць работы пажарнага інспектара шмат у чым залежыць ад плённага ўзаемадзеяння і супрацоўніцтва з прадстаўнікамі органаў улады, адукацыі, аховы здароўя, кіраўнікамі прадпрыемстваў. А каб знайсці агульную мова, трэба быць не толькі дыпламатам, але і ўмець правільна прадставіць сваю структуру.
- У апошні час мы ўсё часцей гаворым пра бяспеку, акцэнтуем на гэтым увагу ў самых розных сферах, - адзначае Юрый. - Радуе тое, што з боку людзей ёсць паразуменне. Прафілактычная праца - важнейшы напрамак дзейнасці. Частым «госцем» прыходзіцца быць у домаўладаннях для праверкі пячнога ацяплення, электраправодкі.
Нярэдка госці ў самым райаддзеле - дзеці. На экскурсіі прыходзяць школьнікі, а таксама выхаванцы дашкольных устаноў, летніх лагераў. Юрый з задавальненнем распавядае ім пра спецыфіку працы ратавальнікаў, дэманструе пажарна-тэхнічнае абсталяванне і пажарныя аўтамабілі. У цёплае надвор'е змагары з агнём арганізоўваюць для дзяцей водную феерыю.
- Магчыма, што не ўся карысная інфармацыя запамінаецца імі адразу, але ў памяці дакладна застаецца нумар 101 і давер да афiцэраў пажарнай службы, - кажа інспектар. - Магчыма, хто-небудзь з іх таксама захоча стаць выратавальнікам.
Дарэчы, у сям'і Юрыя выхоўваецца шасцігадовы сын Лёша, які, нягледзячы на зусім маленькі ўзрост, вельмі цікавіцца прафесіяй таты. Мабыць, у старэйшага Пацеса ўжо падрастае дастойная змена?
Таццяна Падбярэзкая.
Крыніца: dokshitsy.by