Чарговая пасяўная кампанія ў сельгаспрадпрыемствах Докшыцкага раёна завершана

Аграрыям ёсць чым ганарыцца: па тэмпах сяўбы Докшыччына стала лідэрам у вобласці, пры гэтым плошча яравога кліну да леташняга склала больш чым 110 адсоткаў.

На гэтым тыдні былі падведзены і вынікі раённага спаборніцтва сярод механізатараў, занятых на ворыве глебы, падрыхтоўцы яе пад яравую сяўбу і непасрэдна на сяўбе. У гэтым годзе ў двух з трох вышэйназваных намінацый пераможцамі сталі трактарысты-машыністы ва ўзросце да 31 года, а гэта азначае, што моладзь ні ў чым не саступае і нават можа даць фору сваім старэйшым дасведчаным і загартаваным у бітвах за ўраджай таварышам.

Для ўручэння дыпломаў, грашовых прэмій і падарункаў у гаспадаркі выехала прадстаўнічая дэлегацыя ў складзе першага намесніка старшыні райвыканкама, начальніка ўпраўлення па сельскай гаспадарцы і харчаванню Наталлі Вараб'ёвай, старшыні РК прафсаюза работнікаў АПК Васіля Васюковіча і першага сакратара раённага камітэта ГА «БРСМ» Вікторыі Ждановіч.

На сяўбе несумнеўнае лідэрства заваяваў Віктар Суднік з ААТ «Докшыцкі райаграсэрвіс», які стаў годным прадаўжальнікам сямейнай дынастыі і чыё імя за кароткі час стала своеасаблівым раённым брэндам. Думаецца, чарговая ўзнагарода за нялёгкіую добрасумленную працу і цёплыя словы падзякі стануць стымулам для далейшых, яшчэ больш высокіх яго дасягненняў.

Прынамсі, як і яшчэ для аднаго маладога механізатара з аграсэрвісу, Максіма Мiндукшова, які ў спаборніцтве па падрыхтоўцы глебы да сяўбы таксама вырваўся наперад, падзяліўшы перамогу у гэтым выглядзе работ з Алегам Скукоўскім з ААТ «Барсучанка». Як бачым, і гарачы запал Максіма, і спакойная стрыманасць, дэталёвасць ў падыходзе да справы Алега апынуліся выніковымі. Вядома, нельга скідаць з рахунку і арганізацыю працы, і падрыхтаванасць тэхнікі, аднак чалавечы фактар ​​у поспеху любой справы заўсёды грае галоўную ролю. Яшчэ адным яркім пацвярджэннем гэтага з'яўляецца прафесіяналізм і апантанасць у самым цудоўным значэнні слова механізатара Васіля Юхнаўца з ААТ «Таргуны», які заняў першае месца на ворыве. Васіль Анатольевіч адзначыў, што не ставіў для сябе мэты перамагчы - проста добрасумленна выконваў даручанае заданне.

Наперадзе корманарыхтоўка, уборачная кампанія, сяўба азімых. Можна з упэўненасцю сказаць, што імёны названых пераможцаў яшчэ не раз з'явяцца на старонках нашай газеты.

Алена Несцяронак.

Фота аўтара.

Крыніца: dokshitsy.by