14.08.2026

Лукашэнка абазначыў ключавую ўмову для дзяржпадтрымкі ў сельскай гаспадарцы - вынік

Прэзідэнт Беларусі Аляксандр Лукашэнка падчас рабочай паездкі ў Жыткавіцкі раён акрэсліў галоўную ўмову для дзяржаўнай падтрымкі ў сельскай гаспадарцы, перадае карэспандэнт БЕЛТА.

Кіраўнік дзяржавы наведаў сялянскую гаспадарку Міхаіла Шруба. Адным з пытанняў стала далучэнне зямель праблемных гаспадарак да больш паспяховых. Міхаіл Шруб адзначыў, што ў яго ёсць патрэба ў дадатковых сельгасугоддзях. Раней яму былі перададзены ў кіраванне землі адной з гаспадарак Жыткавіцкага раёна, але яны знаходзяцца на пэўнай адлегласці, што выклікае пэўныя праблемы з лагістыкай. У сувязі з гэтым узнікла пытанне аб перадачы зямлі суседняй гаспадаркі, калі яна выкарыстоўвае іх недастаткова эфектыўна. Як адзначыў кіраўнік дзяржавы, калі на добрых землях сельгаспрадпрыемства не паказвае адпаведны вынік, гэта выклікае заканамерныя пытанні: чаму так адбываецца?

Аляксандр Лукашэнка даручыў прапрацаваць гэтае пытанне, але таксама акрэсліў умову, пры якой сельгаспрадпрыемствы могуць разлічваць на падтрымку з боку дзяржавы: "Галоўнае — вынік. Прыйшоў час адыходзіць ад хацелак".

Кіраўнік дзяржавы назваў і іншы крытэрый, які ўлічваецца пры прыняцці рашэння аб далучэнні тых ці іншых зямель да фермерскіх гаспадарак. "Мы адразу глядзім, пад што гэтыя землі. Многія хочуць займацца раслінаводствам, але не жывёлагадоўляй. А чым мне людзей карміць, толькі хлебам? Трэба мяса, малако. Таму я арыентую фермераў, каб яны займаліся гэтымі пытаннямі комплексна", — растлумачыў ён.

Прэзідэнт даручыў дэталёва прапрацаваць пытанне аб магчымым далучэнні зямель да сялянскай гаспадаркі і прапанаваць канкрэтнае рашэнне не пазней за лістапад. Пры гэтым трэба ўлічыць пазіцыі кіраўніцтва гаспадаркі і рэгіёна. Звяртаючыся да Міхаіла Шруба, Аляксандр Лукашэнка падкрэсліў, што для прыняцця рашэння неабходна ў поўнай меры разумець яго пункт гледжання. "Гавары праўду, так, як ты думаеш. У адваротным выпадку навошта я сюды прыехаў? Для будучага развіцця краіны мне патрэбна ісціна", — канстатаваў ён.

Прэзідэнту падрабязна расказалі аб паказчыках і напрамках дзейнасці, дынаміцы вытворчасці, планах на будучыню сялянскай гаспадаркі Міхаіла Шруба. Яна спецыялізуецца на малочнай і мясной жывёлагадоўлі (БРЖ) і перапрацоўцы мяса, свінагадоўлі, вырошчванні агародніны і яе перапрацоўцы. Гаспадарка — валаўтваральнае сельгаспрадпрыемства Жыткавіцкага раёна, на яе прыпадае больш за 30% у кошце валавой прадукцыі сельскай гаспадаркі раёна.

У мінулым годзе ў гаспадарцы выраблена больш за 27 тыс. т малака, амаль 3 тыс. т мяса, а таксама атрымана каля 11 тыс. т агародніны і больш за 7,5 тыс. т зерня, уключаючы кукурузу.

Паколькі сялянская гаспадарка, якую наведаў Прэзідэнт, знаходзіцца на тэрыторыі Прыпяцкага Палесся, ён звярнуў увагу на праграму развіцця гэтага рэгіёна на 2025—2030 гады. Мэта гэтай стратэгіі — прыйсці да канкрэтнага выніку, на што і ўказаў кіраўнік дзяржавы. "У гэтым выніку сутнасць усёй палескай праграмы, якую мы робім, укладваем немалыя грошы", — падкрэсліў Прэзідэнт.