21.08.2020

У КУП «Докшыцкі» намалацілі першую тысячу

Імя Сяргея Зевалiча не толькі ў КУП «Докшыцкі», але і ў раёне з'яўляецца сінонімам да слоў працавітасць, сумленнасць, адказнасць, прафесіяналізм. Гэты энергічны, па-юнацку лёгкі і спрытны ў рухах чалавек з'яўляецца сапраўдным гаспадаром на сваёй зямлі. З якімі цяжкасцямі ні даводзілася сутыкацца за амаль тры дзесяткі гадоў працы ў сельгаспрадпрыемстве, а іх хапала і хапае цяпер, не звярнуў з абранага яшчэ ў маленстве шляху, не кінуўся шукаць ні больш лёгкага хлеба, ні больш доўгага рубля. «На Зевалiчы гаспадарка трымаецца», - часта казаў былы дырэктар КУП «Докшыцкі» Аляксей Асаёнак, і той самай думкі прытрымліваецца цяперашні кіраўнік Эдуард Пачкоўскі.

Узнагароджанне экіпажа ў складзе старшага камбайнера Сяргея Зевалiча і яго стараннага памочніка камбайнёра Сяргея Зязюлi - урачыстасць асаблівая па той прычыне, што гэта наогул першы тысячны намалот у гаспадарцы.

- Колькі працую, не памятаю, каб хтосці з нашых механізатараў дасягнуў такога поспеху, - загараюцца агеньчыкі ў вачах Сяргея Мікалаевіча.

З такой жа радасцю павіншавалі слаўны экіпаж старшыня РК прафсаюза работнікаў АПК Васіль Васюковіч, начальнік аддзела арганізацыі сельскагаспадарчай вытворчасці ўпраўлення па сельскай гаспадарцы і харчаванні Уладзімір Петрушэнка, ўручылі механізатарам ганаровыя граматы і салідныя грашовыя прэміі.

Толькі адгучалі цёплыя словы падзякі і пажаданняў новых перамог, як камбайнеры хуценька занялі свае месцы і прыступілі да звыклай хлебаробнай справы. Урачыстасць урачыстасцю, а яшчэ шмат працы наперадзе.

Алена Несцяронак.

Фота аўтара.

http://www.dokshitsy.by/2020/08/pervuyu-tysyachu/