26.05.2026

Сёння выпускнікі Докшыцкага раёна здаюць свой першы цэнтралізаваны іспыт па прадмеце на выбар

Выпрабаванні праходзяць на базе СШ №1 г. Докшыцы ім. І.С. Палявога.

Як паведаміла старшыня арганізацыйнай камісіі Алена Камінская, дырэктар СШ №2 г. Докшыцы ім. У.Ф. Крышталевіч, усяго сёлета ЦЭ здаюць 86 выпускнікоў.

– Самы папулярны прадмет у докшыцкіх адзінаццацікласнікаў - матэматыка: яе здаюць 40 чалавек. Грамадазнаўства выбралі 28 вучняў, гісторыю Беларусі ў кантэксце сусветнай гісторыі - 6, англійскую мову - 4, па тры чалавекі здаюць хімію і біялогію, два - фізіку.

29 траўня стартуе цэнтралізаваны іспыт па рускай ці беларускай мовах (на выбар). Для іх здачы выпускнікі нашага раёна падзяліліся пароўну: па 43 чалавекі выбралі адзін і іншы прадмет.

Для вучняў іншых школ арганізаваны падвоз. У пункце ЦЭ створаны бяспечныя ўмовы. Працуе буфет.