23.06.2026

Праект «Адзін раён - адзін праект»: Докшыцы сталі радзімай парфумераў і швачак

Докшыцкі раён у Віцебскай вобласці аказаўся ў лідарах па тэмпах росту прамысловай вытворчасці — дынаміка за чатыры месяцы года плюс 16,6 % да аналагічнага перыяду 2025-га. І па ўзроўні заработнай платы рэгіён сярод дваццаці аднаго на Віцебшчыне займае восьмы радок.

Гэта, мабыць, найбольш адчувальны вынік рэалізацыі двух бізнес-планаў з пула ініцыятывы Прэзідэнта «Адзін раён — адзін праект». Вось ужо некалькі гадоў станоўчы ўклад у развіццё мясцовай прамысловасці ўносяць таварыствы з абмежаванай адказнасцю «Докшыцкая швейная мануфактура» і «Космоинвест». Першае створана з нуля ў 2022 годзе і ўжо прырасло філіяламі ў суседніх райцэнтрах Глыбокае і Плешчаніцы, другое адноўлена і набыло новае жыццё ў 2024-м.

У Докшыцкай швейнай мануфактуры 45 супрацоўнікаў вырабляюць за год 350 тыс. карсетных вырабаў па заказе і лекалах СТАА «Конте Спа», аднаго з вядучых вытворцаў адзення, панчох, шкарпэтак і бялізны ва Усходняй Еўропе з геаграфіяй паставак каля 15 краін свету. А «Космоинвест» — гэта 460 найменняў водараў — аналагаў парфумы вядомых французскіх і швейцарскіх брэндаў. 2,5 млн флаконаў у год, якія, акрамя Беларусі, прадаюцца ў 55 гарадах Расійскай Федэрацыі.

Карэспандэнты БЕЛТА адправіліся ў Докшыцкі раён і даведаліся, як швачкам удаецца выконваць паўтара плана і пры чым тут 3D-прынтар. Папутна мы зазірнулі на хлебазавод, галоўнай фішкай якога і дадатковай крыніцай прыбытку з пачатку года сталі венскія вафлі. А таксама пазнаёміліся з маладой сям’ёй — пашукаўшы шчасце ў сталіцы, хлопцы вярнуліся на радзіму асвойваць парфумерную справу.

Падрабязнасці — у чарговым рэпартажы з цыкла публікацый Беларускага тэлеграфнага агенцтва і часопіса «Эканоміка Беларусі» пра развіццё тэрыторый, дзе рэалізавана ініцыятыва Прэзідэнта «Адзін раён — адзін праект». Лейтматыў — эканоміка прадпрыемстваў і рэгіёнаў, паказаная праз лёсы людзей.