18.06.2026

Докшыцкі раён наведаў дырэктар Рэспубліканскага цэнтра па аздараўленні і санаторна-курортным лячэнні насельніцтва Генадзь Балбатоўскі

У рамках адзінага дня інфармавання Генадзь Балбатоўскі і старшыня райвыканкама Сяргей Абірала сустрэліся з калектывам санаторыя "Баравое".

Тэма сустрэчы - "Памяць у імя будучыні", прысвечаная 85-й гадавіне пачатку Вялікай Айчыннай вайны. Мадэратарам тэмы выступіла намеснік старшыні райвыканкама Аксана Палачаніна.

- Стала традыцыяй, што кіраўнікі рэспубліканскіх органаў дзяржкіравання штомесяц сустракаюцца з працоўнымі калектывамі. Асноўная мэта - наведванне прадпрыемстваў і азнаямленне з іх дзейнасцю, магчымасць пачуць праблемныя пытанні, якія неабходна вырашыць на больш высокім узроўні, - адзначыў Генадзь Балбатоўскі.

У сваім выступленні Генадзь Мікалаевіч падрабязна спыніўся на дзейнасці сістэмы санаторна-курортнага лячэння і аздараўлення Беларусі. Таксама ён падзякаваў работнікам санаторыя за ўклад, які яны ўносяць у захаванне і ўмацаванне здароўя насельніцтва, за прыцягненне іншаземцаў, што садзейнічае спрыяльнаму іміджу нашай краіны.

У рамках рабочага візіту Генадзь Балбатоўскі азнаёміўся з перавагамі і напрамкамі лячэння здраўніцы, а таксама пацікавіўся ходам будаўніцтва чацвёртага спальнага корпуса і сучаснага будынка грамадскага харчавання.