10.01.2026

Докшыцкі раён не паддаецца стыхіі

Як паведамілі ў РУП ЖКГ "Докшыцы-камунальнік", сёння ў 4 гадзіны раніцы на барацьбу са снежнай стыхіяй, расчыстку і вобмешку вуліц і тратуараў у райцэнтры выехала 8 адзінак тэхнікі.

У Крулеўшчынскім сельсавеце працуе 2 адзінкі снегаўборачнай тэхнікі, у Бягомльскім — 3.

Для ліквідацыі наступстваў моцных снегападаў у раёне задзейнічана ўся наяўная тэхніка і рэсурсы.

Пасля расчысткі ад снегу сваіх тэрыторый каля малочна-таварных ферм і комплексаў у дапамогу іншым сельсаветам сваю тэхніку накіравалі ААТ "Барсучанка", ААТ "Таргуны", ААТ "Бягомльскае" і іншыя сельгасарганізацыі раёна.

Персанал РУП "Віцебскэнерга" загадзя быў пераведзены ў рэжым павышанай гатоўнасці, створаны аператыўны штаб на чале з генеральным дырэктарам прадпрыемства.

— У раёне электрычных сетак абвешчана кругласутачнае дзяжурства, уся неабходная тэхніка запраўленая, прычэплены генератар. На ліквідацыю якіх-небудзь наступстваў цыклона гатовыя выйсці 40 работнікаў энергаслужбы, — запэўніў начальнік Докшыцкага РЭС Іван Ючкавіч.

У населеных пунктах Докшыцкага раёна працуе снегаўборачная тэхніка.

Работнікі арганізацый, святары выйшлі на дапамогу камунальнікам: прыбіраюць снег каля адміністрацыйных будынкаў і сацыяльных аб'ектаў.

Супрацоўнікі аддзялення ДАІ Докшыцкага РАУС суправаджаюць калону снегаўборачнай тэхнікі на трасе М3 Мінск — Віцебск.

Арганізацыі спажыўкааперацыі працуюць ва ўзмоцненым рэжыме.

Дырэктар Докшыцкага філіяла аблспажыўтаварыства Таццяна Каляга:

— Насельніцтва раёна абслугоўвае шэсць аўталавак. Нягледзячы на складаныя ўмовы надвор'я, усе яны адправіліся па сваіх маршрутах. У Валкалацкім і Параф'янаўскім сельсаветах для руху па маршруце работнікам гандлю аказвае дапамогу спецтэхніка.

Кааператары імкнуцца, каб усе сельскія жыхары былі забяспечаны неабходнымі таварамі.

Сацыяльныя работнікі ДУ "ТЦСАН Докшыцкага раёна" аказваюць дапамогу ў расчыстцы снегу.

Побач з намі ёсць тыя, каму цяжэй. Не застанемся абыякавымі і дапаможам. Разам мы справімся!

У Віцебскай вобласці працуюць больш за 220 адзінак спецтэхнікі і каля 840 чалавек

dokshitsy.by