17.07.2026

Юбілейны XXXV "Славянскі базар у Віцебску" афіцыйна адкрыты

«Добры вечар, гаворыць і паказвае Віцебск» – паводле традыцыі з гэтай прывітальнай фразы на трох усходнеславянскіх мовах пачалося ўрачыстае адкрыццё ХХХV фестывалю мастацтваў «Славянскі базар». 

Пасля прывітання вядучыя далі слова Прэзідэнту краіны. Звяртаючыся да гледачоў, артыстаў і арганізатараў форуму, Аляксандр Лукашэнка падкрэсліў, што без іх не было б гэтага свята.

– Ведаю, што сёння, як і шмат гадоў таму, у зале знаходзяцца беларусы, палякі, рускія, украінцы, прадстаўнікі дзясяткаў іншых краін, якія прыехалі да нас па бязвізе. Ваша прысутнасць тут – гэта тое непарушнае, у чым мае патрэбу наш свет, такі крохкі, нестабільны і абсалютна незразумелы ў сваім развіцці. Мы шмат зрабілі і будзем рабіць для таго, каб «Славянскі базар» заставаўся асновай шчырага і моцнага сяброўства краін і народаў. Гэта так неабходна сёння, - заявіў беларускі лідар.
Ён выказаў упэўненасць, што з іх падтрымкай і шчырай гледацкай любоўю далейшая гісторыя фестывалю будзе доўгай і яркай.

Пасля свайго выступлення кіраўнік дзяржавы ўручыў Гран-пры пераможцы XXXV Міжнароднага дзіцячага музычнага конкурсу Лізавеце Цупрык з Беларусі.

Упершыню за ўсю гісторыю «Славянскага базару ў Віцебску» Аляксандр Лукашэнка ўручыў дзве спецузнагароды «Праз мастацтва – да міру і ўзаемаразумення»: іх удастоены выдатныя кампазітары Аляксандр Зацепін і Леанід Захлеўны.

Канцэрт адкрыцця «Славянскага базару» атрымаўся па-сапраўднаму зорным: на сцэне выступілі вядомыя беларускія і замежныя выканаўцы.

З першых акордаў зал пазнаў «Есаула» народнага артыста Расіі Алега Газманава. Кожны радок з папуры падпяваў шматтысячны амфітэатр. Артыст, якому хутка споўніцца 75 гадоў, даказаў: узрост не перашкода, калі на сцэне гучаць хіты, знаёмыя кожнаму.

Музыка, цыркавое шоу, а таксама песні пра каханне – усё гэта арганічна змянялася на галоўнай віцебскай сцэне. 

Адным з яркіх момантаў стаў выхад усіх удзельнікаў сёлетняга Міжнароднага конкурсу эстрадных выканаўцаў разам з уладальніцай самага першага Гран-пры фестывалю «Славянскі базар» ў 1993 г. Таісіяй Павалій.
– Віцебск – гэта мая творчая радзіма! «Славянскі базар – самы лепшы! – сказала спявачка.

А як жа дождж? На сёлетнім адкрыцці форуму яго не было! Нябесная канцылярыя парушыла традыцыю: замест звыклага «фестывальнага ліўня» – зоркі, прычым не толькі ў небе над Віцебскам, але і на галоўнай сцэне.

Пасля таго як сямейны дуэт – Уладзімір Преснякоў і наша зямлячка Наталля Падольская – выканаў песню «Як я люблю цябе», спявачка звярнулася да Аляксандра Лукашэнкі, з усмешкай згадаўшы, як аднойчы ён сказаў ёй не выходзіць замуж за «маскаля». Наталля Падольская папрасіла прабачэння за свой выбар, але запэўніла, што неверагодна шчаслівая ў шлюбе.

Уся прастора амфітэатра, нават паветраная, была задзейнічана па максімуме. Гімнасты стваралі не проста нумары, а жывую архітэктуру.

Гімнам фестывалю «Усе кветкі ліпеня» пад акампанемент Леаніда Захлеўнага завяршылася ўрачыстае адкрыццё «Славянскага базару». Фінальным акордам стаў салют, які размаляваў зорнае неба.

"Віцебскія весці"