27.08.2021

Саюзныя парламентарыі абмяркуюць 30-31 жніўня ў Оршы інавацыйныя прыярытэты СД

Чарговае пасяджэнне пастаянна дзеючага пры Парламенцкім сходзе Саюза Беларусі і Расіі семінара па пытаннях будаўніцтва Саюзнай дзяржавы пройдзе 30-31 жніўня ў Оршы. Яго тэмай стане ўдасканаленне прававых асноў міжрэгіянальнага ўзаемадзеяння ў Саюзнай дзяржаве ў эканамічнай і гуманітарнай сферах, паведамілі БЕЛТА ў прэс-службе сходу.

"Удзельнікі семінара абмяркуюць прыярытэты эканамічнай палітыкі ў інавацыйных галінах дзейнасці дзяржаў - удзельніц Саюзнай дзяржавы ў кантэксце фарміравання адзінай эканамічнай прасторы, пытанні рэалізацыі інвестыцыйнай палітыкі, узаемадзеяння Беларусі і Расіі ў сферы імпартазамяшчэння, а таксама асноўныя напрамкі і перспектывы прыгранічнага і міжрэгіянальнага эканамічнага супрацоўніцтва", - адзначылі ў прэс-службе.

Разам з саюзнымі парламентарыямі ў мерапрыемстве прымуць удзел прадстаўнікі міністэрстваў і ведамстваў Беларусі і Расіі, навукова-даследчых і адукацыйных устаноў, дзелавых колаў і экспертнай супольнасці дзвюх краін. Акрамя таго, па відэа-канферэнц-сувязі на пасяджэнні выступяць прадстаўнікі Бранскай, Віцебскай, Гомельскай, Магілёўскай, Пскоўскай і Смаленскай абласцей.

У праграме запланаваны сустрэча дэпутатаў Парламенцкага сходу з кіраўніцтвам Аршанскага гарадскога Савета дэпутатаў і Аршанскага гарвыканкама, азнаямленне з работай мультымадальнага прамыслова-лагістычнага комплексу "Бреміна-Орша", ускладанне кветак да мемарыяльнага комплексу "За нашу Савецкую Радзіму" і наведванне аб'ектаў культурнай спадчыны Віцебскай вобласці.

Работа семінара прадоўжыцца 7-8 верасня ў Смаленску, дзе будзе абмяркоўвацца гуманітарнае супрацоўніцтва рэгіёнаў Расіі і Беларусі. Па выніках пасяджэнняў у Оршы і Смаленску плануецца падрыхтаваць практычныя рэкамендацыі, якія будуць накіраваны міністэрствам і ведамствам дзвюх дзяржаў, іншым зацікаўленым структурам.

Пастаянна дзеючы пры Парламенцкім сходзе Саюза Беларусі і Расіі па пытаннях будаўніцтва Саюзнай дзяржавы семінар быў арганізаваны ў 2006 годзе. Традыцыйна ён збірае прадстаўнікоў навуковых колаў, прыхільнікаў інтэграцыі Беларусі і Расіі. Фармат мерапрыемства дазваляе дэталёва разгледзець актуальныя пытанні супрацоўніцтва Беларусі і Расіі ў Саюзнай дзяржаве.

БелТА