03.08.2026

"Ніхто акрамя нас": Дзень дэсантнікаў і сіл спецыяльных аперацый адзначылі ў Віцебску

Некалькі тысяч чалавек сабраліся на тэрыторыі Віцебскай асобнай гвардзейскай паветрана-дэсантнай брыгады, каб адзначыць Дзень дэсантнікаў і сіл спецыяльных аперацый Узброеных Сіл.

На ўрачыстым мітынгу камандуючы ССА палкоўнік Аляксандр Ільюкевіч зачытаў віншаванне Прэзідэнта Беларусі Аляксандра Лукашэнкі.

У ім адзначалася, што без малога стагоддзе блакітныя берэты стаяць на варце інтарэсаў Радзімы, сваёй ратнай працай пацвярджаючы справядлівасць легендарнага дэвіза "Ніхто акрамя нас". У радах ПДВ заўсёды служылі людзі асаблівай загартоўкі, якія ўпісалі нямала старонак у гераічны летапіс: і ў бітвах Вялікай Айчыннай вайны, і ў ходзе лакальных канфліктаў у самых складаных умовах бясстрашныя, непераможныя дэсантнікі з гонарам дасягалі ўсіх пастаўленых задач. Сёння асабовы склад ССА годна працягвае традыцыі ПДВ, зарэкамендаваўшы сябе як надзейны аплот інтарэсаў нацыянальнай бяспекі. Мужнасць і нязломны характар, узорная вывучка, адданасць Айчыне і любімай справе, непарушны баявы дух — неад’емная адметнасць ваеннаслужачых ССА.

"Цвёрда ўпэўнены, што вы ніколі не падвядзеце і заўсёды будзеце гарантам бяспекі нашай краіны і спакою грамадзян", — гаварылася ў віншаванні.
Аляксандр Ільюкевіч падкрэсліў, што ССА застаюцца элітай Узброеных Сіл, родам войскаў, дзе найвышэйшы прафесіяналізм, бездакорная фізічная і маральна-псіхалагічная падрыхтоўка з’яўляюцца нормай, а не выключэннем.

Улічваючы вопыт сучасных узброеных канфліктаў, сёння адпрацоўваюцца новыя спосабы выканання задач. Дэсантнікі патрэбныя там, дзе складана. Больш за чатыры гады яны выконваюць баявыя задачы на паўднёвых рубяжах Беларусі, забяспечваючы мір у нашай краіне і спакой грамадзян.

Аляксандр Ільюкевіч паведаміў, што ў цяперашнім годзе каманда 103-й брыгады прадстаўляла Беларусь на прэстыжных міжнародных спаборніцтвах спецыяльных армейскіх падраздзяленняў, якія праходзілі ў Пакістане. У іх бралі ўдзел 40 каманд, у тым ліку і ЗША. Нашы дэсантнікі сталі другімі.

"Віцебскія весці"