Прафсаюзы правялі маніторынг цэн на школьныя тавары

4 жніўня, Мінск. Прафсаюзы правялі маніторынг цэн на школьныя тавары. Аб гэтым паведамілі ў прэс-службе Федэрацыі прафсаюзаў Беларусі.

Маніторынг быў праведзены ў гандлёвых цэнтрах, універмагах, на рынках, школьных кірмашах і ў гандлёвых сетках ва ўсіх рэгіёнах краіны. Прафсаюзныя спецыялісты дэталёва прааналізавалі кожную групу тавараў для малодшых і старэйшых класаў. Так, больш як на 10 працэнтаў падаражэла канцылярыя для малодшых школьнікаў: сшыткі, простыя алоўкі, ручкі, фарбы, пластылін, вокладкі для сшыткаў і дзённікаў, касы літар і складоў. Прычым кошт канцылярскіх тавараў адрозніваецца ў рэгіёнах. Калі сям'і з Гомельскай вобласці давядзецца патраціць на ручкі - сшыткі Br174,86, то для жыхароў Віцебскай вобласці аналагічны набор будзе каштаваць ужо Br207,81. Дарэчы, у мінулым годзе самая дарагая канцылярыя была ў Мінску.

Аналагічную тэндэнцыю прафсаюзы адзначылі і ў кошце адзення і абутку. Танней за ўсё апрануць дзіця да школы можна ў Гродзенскай вобласці (хлопчыка - за Br611,83, дзяўчынку - Br498,19). Як высветлілася, хлопчыка даражэй за ўсё сабраць у Мінскай вобласці (Br778,53, вобласць была самай дарагой і ў мінулым годзе), а дзяўчынку - у Магілёўскай (Br634,43).

Што датычыцца тавараў для старшакласнікаў, то тут таксама ёсць падзел па абласцях: цэны на адзін і той жа тавар могуць істотна адрознівацца. Напрыклад, канцылярскія тавары для старэйшых класаў выгадней купляць у Гомельскай вобласці (Br161,11). У Мінску ж бацькам давядзецца патраціць на аналагічныя тавары Br230,26, што робіць гэты горад самым дарагім для куплі канцылярскіх і пісьмовых тавараў.

Самае таннае адзенне і абутак для старэйшых класаў можна знайсці ў Гродзенскай вобласці. Апрануць дзяўчынку будзе каштавацьў Br698,14, хлопчыка - Br730,17. Даражэй за ўсё гэтыя пакупкі абыдуцца сям'і старшакласніка з Мінска (Br905,64), бацькі дзяўчынак панясуць найбольшыя затраты ў Магілёўскай вобласці (Br821,91).

Сярэдні кошт экіпіроўкі для хлопчыкаў малодшых класаў за год вырас на 7,5 працэнта, для дзяўчынак - на Br10,3 працэнта. Цэны на адзенне для старшакласнікаў павысіліся на 4,1 працэнта для хлопчыкаў і на 8,5 працэнта для дзяўчынак.

Прафсаюзы штогод аказваюць дапамогу ў падрыхтоўцы дзяцей да школы. Акцыя "Прафсаюзы - дзецям" дзейнічае з 2002 года. Асаблівая ўвага ўдзяляецца першакласнікам, дзецям-сіротам, шматдзетным, маламаёмным і прыёмным сем'ям, а таксама сем'ям, якія выхоўваюць дзяцей-інвалідаў або якія знаходзяцца ў цяжкай жыццёвай сітуацыі. Матэрыяльную і фінансавую падтрымку атрымліваюць падшэфныя дзіцячыя сацыяльныя прытулкі, школы-інтэрнаты, дамы сямейнага тыпу. У мінулым годзе прафсаюзныя арганізацыі ўсіх узроўняў на гэтыя мэты патрацілі больш за Br6 млн. Таксама ў многіх калектыўных дагаворах прадпрыемстваў закладзены нормы па аказанні матэрыяльнай дапамогі бацькам, якія выхоўваюць дзяцей-школьнікаў. Выкананне гэтых норм прафсаюзы таксама трымаюць на кантролі.