Міністр прамысловасці - новаму гендырэктару ММЗ: "З гэтым калектывам можна ісці наперад"

Міністр прамысловасці Беларусі Аляксандр Рагожнік прадставіў калектыву ААТ "Кіруючая кампанія холдынга "Мінскі маторны завод" новага генеральнага дырэктара. Ім стаў Аляксандр Батвіннік, які раней займаў пасаду першага намесніка генеральнага дырэктара ААТ "БЕЛАЗ" - кіруючая кампанія холдынга "БЕЛАЗ-Холдынг", паведаміла карэспандэнту БЕЛТА прэс-сакратар Мінпрама Аксана Каруна.

Міністр прамысловасці выказаў упэўненасць, што кіраўніцкі вопыт і высокі прафесіяналізм дазволяць Аляксандру Батвінніку сумесна з калектывам забяспечыць далейшае эфектыўнае развіццё ММЗ, умацаваць яго вытворчы і інавацыйны патэнцыял.

"На заводзе сфарміравана эфектыўная каманда, моцны калектыў. З такім калектывам можна ісці наперад", - даў наказ Аляксандр Рагожнік новаму кіраўніку.

Кіраўнік адміністрацыі Партызанскага раёна Мінска Валерый Вараніцкі выказаў надзею на канструктыўнае ўзаемадзеянне новага кіраўніка Мінскага маторнага завода з адміністрацыяй раёна.

Як паведамлялася, 12 снежня Прэзідэнт Беларусі Аляксандр Лукашэнка, прымаючы кадравыя рашэнні, узгадніў назначэнне Аляксандра Батвінніка на пасаду генеральнага дырэктара ААТ "Кіруючая кампанія холдынга "Мінскі маторны завод".

Мінскі маторны завод - вытворца сучасных дызельных, газадызельных, газапоршневых рухавікоў. Спецыялізуецца на распрацоўцы, праектаванні і вырабе сучасных трох-, чатырох-, шасці- і васьміцыліндравых рухавікоў. На заводзе выпускаецца больш за 100 мадыфікацый рухавікоў у дыяпазоне магутнасці ад 7 кВт да 330 кВт, прызначаных для ўстаноўкі на сельскагаспадарчую, дарожна-будаўнічую тэхніку, аўтамабілі і аўтобусы, энергаўстаноўкі, кампрэсары і іншыя агрэгаты. Рухавікі ММЗ пастаўляюцца на канвееры 49 прадпрыемстваў Беларусі, краін СНД і далёкага замежжа, прадукцыя прадаецца ў больш як 50 краін Еўропы, Азіі, Афрыкі, Паўночнай і Лацінскай Амерыкі. Пры вытворчасці рухавікоў выкарыстоўваюцца камплектуючыя сусветна вядомых кампаній.