Беларусь і Расія заключылі дагавор аб фарміраванні аб'яднанага рынку электраэнергіі СД

Беларусь і Расія заключылі міждзяржаўны дагавор аб фарміраванні аб'яднанага рынку электрычнай энергіі Саюзнай дзяржавы. Адпаведны дакумент падпісалі прэзідэнты Беларусі і Расіі Аляксандр Лукашэнка і Уладзімір Пуцін на пасяджэнні Вышэйшага дзяржсавета СД у Мінску, перадае карэспандэнт БЕЛТА.

Як адзначаў напярэдадні пасяджэння ВДС дзяржаўны сакратар Саюзнай дзяржавы Дзмітрый Мезенцаў, такім чынам бакі завяршаюць работы па фарміраванні адзінага энергарынку Саюзнай дзяржавы. "Калі камісія пачынала работу ў снежні 2018 года, цяжка верылася ў тое, што за такі кароткі перыяд можна будзе выйсці на міждзяржаўнае пагадненне. Гэта забеспячэнне іншага ўзроўню энергабяспекі Беларусі, узаемавыгаднае рашэнне для энергетыкаў нашых краін", - расказаў Дзмітрый Мезенцаў.

Паводле яго слоў, гэта "ўзаемавыгаднае пагадненне, якое дае магчымасць знізіць да мінімуму страты ў энергасетках, збалансаваць тарыфы, забяспечыць узаемны ператок энергіі дзеля людзей, дзеля папаўнення бюджэтаў". Гэта таксама і вынік уводу ў строй Беларускай атамнай станцыі, фарміраванне той сістэмы адносін, якая грунтуецца на фундаменце большага даверу, таварыскасці і сапраўды раўнапраўнага ўліку інтарэсаў адзін аднаго, дадаў ён.

Міністр энергетыкі Аляксей Кушнарэнка растлумачыў журналістам, што аб'яднаны рынак электраэнергіі будзе фарміравацца паэтапна, з улікам паралельнай работы дзвюх энергасістэм з іх тэхналагічнымі, арганізацыйнымі асаблівасцямі. Функцыянаваць ён будзе на аснове правіл, якія ўжо распрацаваны, праходзяць працэдуру ўзгаднення, якая, паводле слоў кіраўніка Мінэнерга, будзе завершана арыенціровачна ў першай палавіне 2025 года. "На гэтым этапе прадугледжваецца, што ўсе ўзаемаадносіны будуць будавацца праз ўпаўнаважаных сеткавых аператараў. Яны будуць вызначаны і з беларускага, і з расійскага боку", - сказаў міністр.

"Галоўны прынцып тут - раўнапраўе і ўзаемная выгада. Безумоўна, падпісанне гэтага дагавора паслужыць павышэнню надзейнасці энергазабеспячэння, энергетычнай бяспекі Беларусі, Расіі і СД у цэлым", - падкрэсліў Аляксей Кушнарэнка.

Канчатковая мэта абедзвюх краін - аб'яднаць усе энергетычныя рынкі, як газавы, так і электраэнергіі, што было прапісана ў Дагаворы аб стварэнні СД яшчэ ў 1999 годзе.

БелТА