Узнагароду за выхаванне дзяцей уручылі жыхаркам Докшыцкага раёна

Вера Зялёнка з Докшыц і Алена Бандарэнка з Беразіно ўзнагароджаны ордэнам Маці.

Узнагароды і кветкі прывезлі ім да дому 14 кастрычніка, у Дзень маці, старшыня райвыканкама Алег Кавалёнак, намеснік старшыні Аксана Палачаніна, іншыя прадстаўнікі мясцовай улады і працоўных калектываў.

Абедзве жанчыны маюць па пяцёра дзяцей і знаходзяцца цяпер у дэкрэтным адпачынку.

Да гэтага Вера Паўлаўна працавала санітаркай у цэнтральнай раённай бальніцы, Алена Аляксандраўна - жывёлаводам у сялянскай гаспадарцы «Мацкевіч». Абедзве зарэкамендавалі сябе са станоўчага боку.

У дакшычанкi чатыры дачкі і адзін сын. Вікторыя вучыцца ў адзінаццатым класе, мае добрыя вынікі па фізічнай культуры і працоўным навучанні. Дыяна - у дзевятым, любіць гуманітарныя прадметы. Сяргей - сямікласнік, Дар'я - трэцякласніца. Ксенія выхоўваецца дома.

У шматдзетнай мамы з Беразіно тры дачкі і два сыны. Кірыл вучыцца ў восьмым класе, захапляецца футболам і наогул мае шырокае кола інтарэсаў, з задавальненнем удзельнічае ў агульнашкольных мерапрыемствах. Валерыя - першакласніца. Ульяна наведвае яслі-сад. Іван і Злата дома з мамай.

Маладыя жанчыны - працавітыя, клапатлівыя, стварылі ў сем'ях неабходныя ўмовы для самарэалізацыі дзяцей.

Віншуючы мам з высокай узнагародай, Алег Кавалёнак падзякаваў ім за годнае выхаванне дзяцей, пажадаў здароўя і дабрабыту.

14 шматдзетных жанчын з Віцебскай вобласці ўдастоены ордэна Маці у кастрычніку.