Сустрэча-рэквіем да Дня памяці салдат, загінуўшых у мірны час, прайшла ў Докшыцах

Кожны год пятага жніўня ў райцэнтры праходзіць мерапрыемства, прымеркаванае да Дня памяці салдат, якія загінулі ў мірны час.

Вось і ў гэтым годзе па традыцыі яно пачалося з памінальнай службы ў царкве і касцёле, пасля чаго старшыня раённага выканаўчага камітэта Алег Кавалёнак і старшыня раённага Савета дэпутатаў Валянціна Рандарэвiч разам з прадстаўнікамі грамадскасці ўсклалі кветкі да помніка ваеннаслужачым. Салдат, якія загінулі ў мірны час, успомнілі пайменна на сустрэчы-рэквіеме, якая адбылася ў чытальнай зале Дзіцячай бібліятэкі.

- Вельмі хочацца, каб традыцыя ўшанавання памяці аб тых рабятах, якія, аддаючы абавязак Радзіме, па волі лёсу не дажылі да гэтых дзён, захоўвалася і ў будучыні, - казала старшыня раённага Савета дэпутатаў Валянціна Рандарэвiч. - Тое, што памяць пра іх вось ужо колькі гадоў жыве не толькі ў сэрцах іх родных і блізкіх, заслуга члена рэспубліканскага Камітэта салдацкіх маці Валянціны Карасцялёвай. Гэта яна, пахаваўшы сына Ігара, калі той быў салдатам тэрміновай службы, не засталася сам-насам са сваім горам, а аб'яднала вакол сябе іншых маці, якіх спасцігла падобная бяда.

Ваенны камісар раёна Віталь Леснiчэнка адзначыў, што памяць пра салдат на вякі застанецца ў помніку, у дрэўцах, пасаджаных каля яго.

Пра тое, як стваралася грамадства салдацкіх маці, распавяла Валянціна Карасцялёва. З тых часоў мінула больш дваццаці пяці гадоў, але жанчыны сябруюць і падтрымліваюць адна адну і сёння. Валянціна Сямёнаўна збірае і свята захоўвае ўсю інфармацыю, што датычыцца дзейнасці арганізацыі. Магчыма, у будучыні ўсе гэтыя дакументы, фатаграфіі, газетныя артыкулы будуць перададзеныя ў Бягомльскі музей народнай славы.

Часта звяртаецца да гэтай тэмы ў сваёй літаратурнай творчасці і наш вядомы пісьменнік, драматург Фёдар Палачанін, які таксама браў удзел у сустрэчы. Ён распавёў пра яшчэ адзін завершаны не так даўно творы - п'есу «Ад лёсу не ўцячэш».

Яўгенiz Малевіч.

Фота аўтара.

Крыніца: http://www.dokshitsy.by/2020/08/ko- dnyu-pamyati-soldat /