Адрас: 211722, г.Докшыцы,
вул.Ленінская, д.31
Прыёмная:
8 (02157) 3-25-10 з 8.00 да 17.00
Факс:
8 (02157) 3-25-11
Электронная пошта райвыканкама:
rikdok@vitebsk.by
Пяць маладых спецыялістаў прыехалі ў гэтым годзе ў ААТ «Бягомльскае». Гаспадарка прыцягнула заработнай платай - вышэй, чым прапаноўвалі іншыя, вырашэннем жыллёвай праблемы і месцазнаходжаннем - недалёка ад сталіцы.
Сярод новенькіх дзве сямейныя пары, якія родам здалёк, і адзін мясцовы хлопец.
Мікалай Радзюк - з Маргавіцы, пасля заканчэння Барысаўскага дзяржаўнага каледжа ўладкаваўся ў «Бягомльскі» слесарам. Жыве дома, на працу дабірацца блізка. Двойчы быў тут на практыцы, таму перад прыходам на пастаяннае месца не хваляваўся - калектыў спадабаўся, ёсць у каго спытаць параду.
Сямейныя скончылі Беларускую дзяржаўную сельскагаспадарчую акадэмію ў Горках. І таксама падчас навучання праходзілі практыку ў гэтай гаспадарцы.
Кацярына і Мікалай Якаўцы - бухгалтары. Яна з Гомеля, ён - з Лунінца Брэсцкай вобласці.
– На размеркаванні «Бягомльскае» аказалася адзінай гаспадаркай, дзе давалі службовае жыллё, - успамінае Мікалай. - Гэта стала адным з рашаючых фактараў пры выбары месца працы. І зараз мы плацім за мэбляваную двушку толькі дзесяць рублёў у месяц. Да канторы ад нашай кватэры пяць хвілін ходу.
У кабінеце Каця з Мікалаем сядзяць побач. Хаця ўчасткі працы вядуць розныя, але раяцца адзiн з адным. Базу ў акадэміі атрымалі грунтоўную, таму з вялікімі цяжкасцямі ў бухгалтарскай справе не сутыкаюцца.
Тамара і Вадзім Савіцкія - аграномы, прычым Вадзім - галоўны. Муж з Аршанскага раёна, жонка - з Дубровенскага. Абодва скончылі спачатку аграрны каледж, потым разам паступілі ў акадэмію на скарочаную форму навучання. Праца падабаецца - шмат бываюць на свежым паветры - жартуюць, што «гуляюць па палях».
Здымнае жыллё ім у поўным аб'ёме аплачвае гаспадарка.
Прыезджым падабаецца Бягомль, бо тут чыста, прыгожа, шмат гандлёвых кропак, задавальняюць транспартныя шляхі зносін. Яны сябруюць паміж сабой і з іншымі маладымі спецыялістамі гаспадаркі.
88 маладых спецыялістаў прыехалі ў гэтым годзе ў раён:
32 - аграпрамысловы комплекс;
27 - сацыяльная сфера;
18 - прамысловасць;
11 - будаўніцтва, ЖКГ.
Ніны КРУКОВІЧ
Фота аўтара
Крыніца: https://www.dokshitsy.by/2021/11/priexali-v-oao-begomlskoe/