Дыялог пакаленняў прайшоў у Докшыцах

У мінулую пятніцу, 29 кастрычніка, споўнілася 103 гады, як моладзь краіны Саветаў была аб'яднана ў сваю арганізацыю – камуністычны саюз моладзі. Пазней ён стаў усесаюзным і ленінскім. Праіснаваўшы да 1991 года, УЛКСМ атрымаў славу арганізацыі, дзе кавалі маладыя кадры будаўнікоў спачатку сацыялізму, а потым камунізму. На двары іншы час, але і сённяшняя моладзь мае арганізацыю, галоўная задача якой садзейнічанне ўсебаковаму развіццю маладых людзей, выхаванне іх на традыцыях патрыятызму і духоўна-маральных каштоўнасцей. Невыпадкова, што менавіта дата 29 кастрычніка была абрана днём правядзення адкрытага дыялогу паміж пакаленнямі былых і сённяшніх камсамольцаў.

Перш чым у малой зале райвыканкама пачалася гутарка-ўспамін аб тым, як было раней і што з той шматгадовай практыкі можна запазычыць сёння, удзельнікаў дыялогу павіншавала намеснік старшыні райвыканкама Аксана Палачаніна. Дарэчы, калі Аксана Эдуардаўна па прычыне свайго ўзросту толькі крыху захапіла камсамольскі час, то па складзе характару заўсёды была ў камсамольскіх шэрагах. Не было той грамадскай справы ў Парплішчанскай школе, саўгасе, сельсавеце, у якой бы яна не прыняла ўдзел, здаралася, што разам з мужам, а то і сынамі. Таму так ад душы ліліся добрыя словы ў адрас і сёння актыўных людзей, якія некалі з гонарам насілі званне камсамольца.

– Выдатна, што камсамольскі рух працягваецца, што захаваліся тыя высакародныя мэты, дзеля якіх жылі і працавалі прадстаўнікі старэйшых пакаленняў, - сказала Аксана Эдуардаўна. - Жадаю вам і сёння не губляць стойкасці духу, бадзёрасці, быць прыкладам для маладых, ісці ў нагу з часам. А моладзі - заўсёды імкнуцца наперад.

Яна перадала цёплыя словы віншавання ад ініцыятара дыялогу - сапраўднага камсамольскага лідэра, былога першага сакратара райкама БПСМ, а сёння старшыні раённага Савета дэпутатаў Валянціны Рандарэвіч, якая не змагла прысутнічаць на сустрэчы.

А потым справу ўзяла ў рукі сённяшні сакратар райкама ГА «БРСМ» Вікторыя Ждановіч. Яна запрасіла да размовы, калі так можна выказацца, ветэранаў камсамольскага руху ў раёне. Пачала прамову загадчыца аддзела райкама камсамола ў 1980-1985 гадах Алена Сарокіна з адказу на пытанне: «Як камсамол паўплываў на ваша жыццё?»

– Ён даў устаноўку на тое, што чалавек можа быць маладым доўга, не старэць душой, - упэўнена Алена Міхайлаўна. - Камсамольцы 1970-1980 гадоў і сёння актыўныя, любяць жыццё, займаюцца спортам па меры магчымасці, развіваюць свае творчыя здольнасці. Яны дапытлівыя, любяць падарожнічаць і адгукаюцца на любую справу. Мяркую, у першую чаргу, па наведвальнікам дзённага аддзялення для пажылых, у якім зараз працую.

А яшчэ ў наш час камсамол даваў пуцёўку ў жыццё. Камсамольскі білет імкнуліся мець усё, і не было страшней ганьбы, чым вылецець з арганізацыі за нявартыя камсамольца паводзіны.

Віктар Малаш, сакратар настаўніцкай камсамольскай арганізацыі Тумілавіцкай СШ (1984-1989гг.), першы сакратар райкама камсамола (1990-1991 гг), а зараз галоўны спецыяліст райінспекцыі ПРіААС:

– Камсамол сур'ёзна рыхтаваў да дарослага жыцця. І жыць нам было цікава, весяла. Першымі ішлі на суботнікі, ехалі на маладзёжныя будоўлі, турзлёты, працавалі ў калгасе, арганізоўвалі святочныя «агеньчыкі». У школе быў моцны калектыў мастацкай самадзейнасці, у якім актыўна ўдзельнічаў і сам дырэктар школы Міхаіл Сяргеевіч Гаўрыловіч. З канцэртамі, падчас якіх гледачы апладзіравалі да болю ў далонях, мы пабывалі ў кожным клубе сельсавета, на кожнай ферме. Вяскоўцы не адпускалі нас, патрабуючы па некалькі разоў выконваць упадабаныя ім песні.

Калі ў 1991 годзе разам з КПСС быў скасаваны і УКСМ, многія разгубіліся. Моладзь засталася сам-насам са сваімі праблемамі і жаданнямі. І таму заканамерным было ўзнікненне ў 1995 годзе Беларускага саюза моладзі (БСМ), які ў 1997 атрымаў назву БПСМ. Аб гэтым часе добра памятае галоўны спецыяліст аддзела землеўпарадкавання райвыканкама Генадзь Парцянка.

– Сакратаром камсамольскай арганізацыі калгаса імя Суворава я быў да 1991 года. У райкам БПСМ, на пасаду другога сакратара райкама запрасіла Валянціна Юр'еўна, а тады першы сакратар маладзёжнай арганізацыі Валянціна Лабанава. У сваёй дзейнасці мы абапіраліся на ранейшы камсамольскі актыў, доўга нікога не трэба было ўгаворваць: агітавалі справамі. Праводзілі вечары адпачынку, спаборніцтвы, устанавілі тэнісны корт. Прыдумалі конкурсы «Уладар вёскі», «Міс Докшыцы». Увесь сезон у гарадскім парку праходзілі суботнія вечары для моладзі І, заўважце, усе мерапрыемствы былі вельмі масавымі, хлопцы самі выказвалі жаданне стаць іх удзельнікамі, – падзяліўся Генадзь Мікалаевіч. - Завяршыў свой камсамольскі шлях на пасадзе ўжо першага сакратара райкама БПСМ.

Цікаўныя апавяданні былых камсамольцаў не маглі пакінуць абыякавымі прадстаўнікоў БРСМ: старшыню Маладзёжнай палаты Вольгу Карніловіч, актывістаў маладзёжнай арганізацыі Паўла Латковіча і Рамана Январава. Яны шмат задавалі пытанняў, асноўным з якіх, мусіць, стала: «Чаго не хапае сённяшняй моладзі?». На яго старэйшыя таварышы адказалі амаль аднолькава - зносін. Параілі крыху адарвацца ад гаджэтаў і азірнуцца вакол - жыццё такое цікавае, асабліва калі ты малады.

Былы сакратар школьнай камсамольскай арганізацыі, а цяпер навуковы супрацоўнік Бягомльскага музея народнай славы Ала Каралевіч расказала пра гісторыю камсамольскага руху на тэрыторыі нашага раёна, і на гэтым жывы, вясёлы, лірычна-настальгічны, напоўнены непадробнай цікавасцю, жартамі і гумарам адкрыты дыялог завяршыў сваю працу. Ці быў ён плённым, пакажа час.

Тамара Альшэўская.

Фота аўтара.

Крыніца: https://www.dokshitsy.by/2021/11/dialog-pokolenij-proshel-v-dokshicax/