Цэнтр з вітруальнымі эфектамі

Пракуратура раёна сумесна с раённым аддзелам па надзвычайных сітуацыях арганізавалі для пачаткоўцаў СШ № 1г. Докшыцы экскурсійную паездку ў Віцебск. У час восеньскіх вакацый дзеці пабывалі ў спецыяльным цэнтры бяспекі абласнога ўпраўлення МНС. Маленькія наведвальнікі акунуліся ў “рэальныя надзвычайныя сітуацыі”, якія могуць адбыцца дома, на вуліцы, вучыліся асноўным спосабам абароны, прыёмам аказання першай медыцынскай дапамогі.

Ярка аформленыя памяшканні цэнтра абсталяваны з выкарыстаннем высокатэхналагічных адукацыйных трэнажораў-сімулятараў, якія дазваляюць стварыць штучную маланку, імітаваць пажар з вялікім задымленнем. Мадэлююцца таксама сітуацыі, калі трэба дапамагчы тым, хто праваліўся пад лёд, каго ўдарыла токам.

У адной з залаў цэнтра бяспекі ёсць спецыяльны квэст-пакой, дзе па просьбе выратавальнікаў дзеці спрабавалі, адказваючы на пытанні, прадухіліць альбо ліквідаваць надзвычайную сітуацыю. З гэтай задачай докшыцкія школьнікі справіліся на выдатна.У завяршэнні экскурсіі пачаткоўцы наведалі выставу ваеннай тэхнікі, а таксама мемарыяльны комплекс, у якім захаваны неўміручы подзвіг народа.